Yohaannisixxa Waleella 19

Golalooke Fadhachcho’n Ookkone Ofo’leekixxee

11 Ookkoneechchi uduma iima banedee’na’a afenne; kunnise mitti golalook fadhachchi hedhemman; faadhachchoke’ni hana xuurameesikinna dhugaatike hiyyememmak itti offo’lemman; isinna qullummati muraan; lolakanna lolaan. 12 Ille isixxi giiratike bubenjishshaten; umo ifiki hannanna heddo kallachchuwwa afe’een; isi gadhi darre ayyinna egenabaak summi isi hana borreesseme’een. 13 Isi mundeti laaqendeexxa semma odho’wedheen; summi isikinna Mageniinke hiyyichchon. 14 Iimmik sannachchuwwi golaloxxa, ca’ittenna eloxxe layinoxxa seemma oddo’weexxi golallamma fadhado’ni ofo’leexxi isoo hordofa’nemman. 15 Arduwwakanna ganaak qaraki wolaantichchi afo’o isikena’ni fulaan; «Sibljinxe siqqichchonninna insa’nee galchaan» Isi duuchchiinxa dande’aake Lumoke Mageniinxxa jabaxxe aarexxa woyinetixxa miinccammaka hirbeessaan. 16 Seemma isixxe’ninna gudeeda isike’n «Moyanjuwwiinke moyanjinna goottuwwiinke Gootta» hiyyemaak summi borreessemedheen.

17 Ookkoneechchi uduma mittti iimik erganji arishshoti hana uurre’naa afenne; isinna iima phirri hite me’itaaxxe ci’a duuchchi’a hafuura gikki asseexxi, «Amme eetenne Mageniinxe lumoxxe jilaba’a bukki hiyye! 18 Bukki hitina’neelchinna moyanjuwwiinka maala, bagediinke ajajalluwwika maala, jajjaba mannika maala, fadhadiinkanna fadhado gulufatammake mannika maala, iittanni manni duuchchika kunninna goottuwwiinkanna garbuwwiinka, lumollamiinkanna shiixxeramiinka maala ittino’aten.»

19 Iitanni iikki biniinchi buttatik moyanjuwwi, insa’neeki loliinki manninna golalooke fadhachchi hana ofo’lemmake’ninna isike loliinke sannachchin welti lolakee bukki hinee’naa afenne. 20 Yaane kinni iikki biniinchi abideme; isinni weltinna isi edo beessisuwwa assa’emmak dharichchi wabeek abideme; konne beessisuwwinni ookkone biniichika beessisa adhdheekaaranna isixxe misile kumbu hiyyeekara dedhake’ni ibisaa’emman. Kunni lamiing hedhoti he’neeshshanni dinneti hiyyemaake ha’yitaamaxxe kinjixxe giiratixxe abbaayya’n hunemme. 21 Weli gatemmak loliink manninna ookkone golalooke fadhachcho’n hana ofo’lemmakike afo’onaa’ni fula’neeke wolaantichchinni shiyemme; ci’a duuchchanna maala insa’neeka itte goddite.