Yohaannisixxa Waleella 20

Kuma Woggaxxa Mootumma

1 Eettene dhimotixxa qulfenna lumooka haachchaba anga abixe’eeki iimik erganji iimatenaa’n butti’a dagaa’naa afenne. 2 Isinna olmika bofa eettenee jawwe ookkonee duriisa yookaan Seexana abideexxi kuma wogga isoo usure. 3 Kuma wogga muddaa qico’ni arduwwa dedhake’ni ibisabaashsha eettene dhi’mo’n isoo huneexxi itti cufe, maxxansakanna itti hana maxxanse; ookkoneechchi uduma heenoxxe yanna’a isi tikema hasissaan.

4 Ookkoneechchi uduma mootuwwa afenne; eettene mootuwwa’ni murte muratee baalloomi uwweme’emmak manni itti ofo’leemman; iittanni Yessuusi Kiristoosixxa dhugaa kulatixxenna Magniinke hiyyichchi’a goobi insa’nek kutemeeke mannixxa lubbuwwa afenne; insa’ne ookkone biniinchi’a yookaan isixxe misile’a kumbu hineba’a; ifike alba’n yookaan ifixxe anga’n ookkene biniinchika beessisa uggudhineba’a; insa’nenna reyotenaa’n ke’neexxi Kiristoosinni welti kuma wogga moone. 5 Weli reyotenaa’n ke’ebaangi gateek kinni kumma wogga mudda qico’n reyotenaa’n ke’neba’a; tinni taakkessoxxe ke’ani. 6 Taakkaxxe ke’a’ni qoodemaak duuchchi eebbisemmeekenna woyyooleten; langaxi reyo insa’ne’n baallooma affebaan; yaane kinni insa’ne Mageniinxenna Kiristoosixxe qeese kandaan; isinni weltinna kuma wogga moonaan.

Durisiinxa Injifatema

7 Iitti kuma wogga muuxendaa wodda Seexani usurrakenaa’n tikemaan. 8 Shoolinge buttatike kasa’ni hedheeka arduwwa: Googiinna Magoogii’i dedhisa’n insa’nee bagediinbaa bukki asso’a fulaan; laakkossi insa’neekinna abbaayyati qarqara hedheeke maanchishshaten. 9 Insa’nenna butta duuchcha’n fulleexxi qulliyyetixxa kaambenna ookkone eeyyemeeka qachcha bunqe. Yaane kinni giira iimatenaa’n dirrite daggee insa’nee itte. 10 Insa’nee dedhake’n ibisemmak durriis, iikki biniinchinna iikki dharichchi wabeek hedheexxe diinni hiyyemake ha’yaake kinjixxe giirraxxe abbaayya giddo hunemme; insa’nenna hashsha barra duuchchi woddanaa’n duuchchi woddi’a abara uundaan.