1 Solomoonka mammaassuwwa,

Muxxe belti anna gammachchiisa,

hawwawwi belti kinni amatee yaaddote ila.

2 Seeribeloke orinni daggeexxi karra la'o affeba'a,

qullummate'n gala kinni reyotenaa'n gatisa.

3 Duuchchi Woddik Gootti qulliyye sololsabaan,

fuggaalleeyyetixxa halcha kinni oranni gatisa.

4 Hujete'ni goofaak manji hiyyoommaan,

jabaate huccaaki kinni duroommaan.

5 Midha aagammaxxe yanna'ni bukki assedhaak belti muxxete, midha aassatixxe yanna'n diiphphaak kinni salphata.

6 Qullichchi manji eebbisema,

hunnati manjokke'n ke'a manni kinni hunnati ke'a ifixxa eloke haaso'inni buqqa.

7 Qulliyyetixxi qalli hiyyema eebbate,

fuggaalleeyyetik summi kinni dedheme gata.

8 Yaada elokiki manji ajaja adhdhaan,

oosommatake afoollichcha manjo'ni kinni ba'nete iso'n daggaan.

9 Dhugaatik manji ruphphi belo hedhaan,

dabaaleessi manji kinni abidema.

10 Manjoke'n elobaaxxenni qinfi hiyyaaki rakkote geessissa,

afoollichchi oossoommataakinna ba'nete iyyedaga.

11 Qullichchi manjiki afo'i hedhotixxe muummeshshaten,

hunati manjoke'n ke'aa manni kinni hunnati ke'a ifixxa eloke haaso'inni buqqa.

12 Jibbi lola ke'issaan,

jaalala kinni dedha duuchcha gattowwaal hita.✝

13 Muxxumma eloyo'oxxa gargar assaake manjike afo'n hexxaan,

kuti kinni qalbeeffachcho afebaake manjike dudduro'nite.

14 Muxxe manni ege'na gudhdhaan,

oossoommataak manji afo'i kinni ba'nete iyyedaga.

15 Durumma dureyyete'e gollaken,

yaane kinni hiyyumma hiyyeeyyete'n ba'ne iyyedagga.

16 Qulliyye mannixxe qullummaki rundi hedhoten,

fuggaalees mannixxi la'o kinni xixemate.

17 Gorsa adhdhaak wele mann'a hedhotike ora leellishshaan,

kula adha'baaak kinni dedhiinke ora'n akeeka.

18 Ifika jibba buqe'e sa'aak dharcha afo'iken,

odo elqe kayya rokaaki duuchchi oossoommateeken.

19 Haaso'iinxe birasa'ne'n cubbo gophendaba'a,

afo'o ifika buqedhaak kinni muxxete.

20 Qullichchi manjik afo'i ca'a hiyyeeke birretike sibljishshate,

fuggichchi manjiki yaadi la'o afeba'a.

21 Qulliyyetik haaso'i heddo manni'a la'o uwwaan,

oossoommataakir kinni eloyo'oxxa gargar hiissa gophatenaa'n kexxeexxa renna.

22 Duuchchi Woddike Goottixxi eebba manjo duroonssitaan, isi

rakko ise'ni lebabaan.

23 Oossoommataak manji fuggoxxa hujaa wodda gammadaan,

qalbeffachcho afeek kinni muxxummate'n gammada.

24 Fuggichcha manjo'n sodaateexxe yaane dagga,

qullichchi halcheexxi isi'a uwwenda.

25 Hobonbalte gandaa wodda fuggaalleyye fiyende baxxa,

qulliyye kinni duuchchii wodda hexxemmaba lele'mitebaang hexxaan.

26 Majajaachch issotee, wiliille illetee eldammabaashsha,

boose'i manjinna isoo'o ergedhaakeri'a iittande.

27 Duuchchi Woddika Gootta sodaata hedhotika baro qeerrissa,

fuggaalleyyetik bari kinni haru'me oranni gata.

28 Qulliyyetixxe halchaki muuxami gammashshoten,

fuggaalleeyyetixxi halcha kinni tola gattaan.

29 Duuchchi Woddike Goottik ori qulliyyete'e gollake,

fuggaalleeyyeete kinni ba'nete.

30 Qulliyye haranga le'mitaba'a,

fuggaaleyye kinni buttate'n hexxaba'a.

31 Qulliyyetik afo'i beekuma haaso'aan,

daba haaso'aak arrabi kinni woxemaan.

32 Qulliyyetik afo'i seeriinxe yaane haaso'a,

fuggaalleyyetik afo'i haaso'a ege'nechchi kinni fuggoxxe calla.