1 Anke beltoo! Muxxumma anxa dho'o hite caqasi,

qalbeefachchotika anka hiyyichchonna adda laqi;

2 Tinninna elo yooxxa gargar foyya horattattoshanna,

haaso'i atiki ege'na leellisho'aten.

3 Yabaabulto manjichchoke afo'onaa'ni malbi coccoba'neeke labaan,

haaso'i isekinna buuri irra shaqqaken.

4 Udumi uduma kinni isee heexotishsha qaraarteexxe,

lame qarike wolaantichchishshanna woxxaaxxen.

5 Ori isek rewotiba'a geessisaan;

me'inji isekinna hirreessake'n iyyemaraan.

6 Ise hedhotike orixxee'e mitte yaadonna affebaan;

me'inji isek midaa middichcha orani;

kaddo malee'e ise'ni ege'nemebaake.

7 Anxe oosee! Hiyyaannexxa caqasse;

ha'no barachchiisenneke hiyyechchinaa'n qootinoqqe'e.

8 Iitta hexxeexxe manjonaa'n bayyati,

isexxe baxxeba'anna midde shiqqoxxe'e;

9 Tinninna, atiki oosummatiki uduudi welekee uwwemabaashsha,

hedho atixxinna mararabaake manjixxe anga'n shiyendabaashaten.

10 Alagi karra atixxenni fenxe hiyyabaashsha,

elootte alfitettelchchinna wele manjika mine duroonsabaashshaten.

11 Bari atiki muuxemaa woddanna maal atik mudaa wodda,

aaddaton;

12 Atinna hitatto qici, «Mayee cabbensha gibenne?

Tuffatennexxi manjiinka gorssa hara adhdha gibenneki mayeete!

13 Anke barachiisaluwwika haaso'a laqa gibenne;

gorsa insa'nekanna adhdhebe'no.

14 Tuuta duuchchi edo,

ba'eeqa gatene» hitatton.

15 Are atixxi ati'a muummetike wodi'ishshaten,

eettene muummenaa'ninna ha'wi.

16 Atixxi muumme gadhi'a,

atiki wodi'i weldeennatiba'a yaa'ataa?

17 Atixxe muummekinna baletiki wodi'i ayyi manjinna,

atinni qabe qoodemabaake atinge calla kadowwaal.

18 Tennexxe muttaara atixxi are ati'a muummetike wode'e kaddemmaxxee,

ise'n gammad.

19 Ise ati'a eeyyemeeke meyyake gadansan; danchumma callixxe geedummashsha,

unun isek atee duuchchii wodda goddisowwaal,

jaalala isexxinna ate'e boojito'o.

20 Anke beltoo! Yabaabulto manjoxxe jaalalanni mayee machchoottatto?

Wele mannixxa are mayeeta hanqalfitatto?

21 Mayee'e? Duuchchi Woddiki Gootti manji assaaxxa duuchcha uudammaxxe'e,

me'injo isika duuchchanna kokammaxxeeten.

22 Fuggaalleessa manjo umo ifingixxe fuggoxxe huje fonxortaan;

cubbo isixxinna wodarotishsha iso'o qaxxafa.

23 Hedhotixxe cabbema gophanaa'n kexxeexxa reyaan;

hara bira saxxeexxe gowwummanaa'n kexxeexxa orakenaa'n ba'aan.