1 Heddo xixichchi uduma higa gophe itti jabeessedhe jallaak manji,

dedhange'n copheeba gonphaan; mare e'yaaba anfabaan.

2 Qulliyye galchate'e filendaa wodda ardi yo'oshsha gammadaan;

fuggaalleeyye filendaa wodda kinn manni yaaddot aaddani.

3 Beekkuma eeyyaak manji ifika anna gammachchiisaan;

yaababul jaaluwwi kinn isixxa karra faangessaan.

4 Dhugaatixxa murte bogi giddo fakkanshat moyanji boga nageesaan;

matta adhate'e haafemaaki kinn nage'a balleessan.

5 Ifike jaaluwwa'ni shokko hujaak,

ifinni ifi sagadhaan.

6 Fuggichchi manji ifi'aan hujemmanxe cubbo'ni sagaremaan;

qullichchi kinn faarsa'n ililisaan.

7 Qullichchi manji hiyyeessiinxe dhuga'a laalataan;

fuggichchi kinn bashshi hiyyan.

8 Futti hiyyeeshsha galamma manni qachcha daaqisaan;

beeki manni kinn mufe qiidisaan.

9 Ege'na afeek manji hawwawwik weli ku'late'e songo marreele,

gowwi aareme jinne nage'a balleessaan.

10 Manjo anga sa'ek mann dhugaatika manjo eenabaan;

qajeelakanna shiyate'e gaandaan.

11 Gowwi manji futti hiyyeenba aare bidhdhaan;

ega'na afeek kinn osse ifi abixxan.

12 Galchanji dhariinxa odo caqasa'noole;

hayyoole duuchcha diinameeyyete kaddaan.

13 Hiyyeessakanna iso'o miicaammaka manjo ille uushsho uudabaaki

Duuchchi Woddik Gootti duuchchinge'e affaaxxa ille uwween.

14 Moyanji hiyyeessake'e dhugaatixxa murte uwweele,

mootumma isixxinna baro baro'ni jabaatte'e hexxaan.

15 Oose kutik gananna xixa muxxe kandaasha assitaan,

nossichcho ba'eeki belti kinni ildeenxa ama salphisaan.

16 Fuggaalleessi manni galchate'e filemoole cubbo bira sa'issinaani,

qulliyye kinn insa'nexxa iba uuddan.

17 Belto atika xixi, nage'a ati'a uwwaan,

lubbo atixxanna gammachchiisaan.

18 Leella hexxeebaa boonchik ardi xeereme'e wocci hiyyaan,

seera heqqedhaaki kinn isi eebbatiken.

19 Erganji xixa gophoole afo'i callinni baratabaan,

ati hitaattenxi yaane iso'ni aagoolenna midde ajajemabaan.

20 Muddame haaso'aaka manjo uudeenn hexxette?

Isi mannii'n oossoommateeki manji hegeri ba'abaan.

21 Manji mini giddo ergatema'ni oosummateenaa'ni ke'isse xoo'mamik nophphoole,

udumi uduma yaaddo hanqattabaan.

22 Aarameessi manji lola ke'issaan,

hifatichchi bira saxxeexxa cubbo hujaan.

23 Manjo holla isinxi iso salphisaani,

eloka hafuura afeeki kinni ulfaataan.

24 Moodhalchik welti guddaak ifi huneeken,

kakatoolenna midde dhugaa fulche haaso'abaan.

25 Manjo sodaataak fuggoxxe'ni ibaani,

Duuchchi Woddike Gootta'n addatemaaka kinn isinni heqqaan.

26 Heddi manni moyanjokenaa'nii elle alfo'a hasaan,

yaane kinni manji dhugaatixxa murte alfaaki Duuchchi Woddike Gootti darree'niten.

27 Qulliyye sobaaleyye manna jibbitaan,

fuggaalleeyyetinna qajeela manna gibbaan.