1 Muxxumma mine ifika ijaadhdhite;

torbaane ifika utuphphuwwanna uggite.

2 Jila affeexxeenna hore dulde; woyinetixxa bookanna bulbulde;

la'otanna qophpheessite.

3 Ifixxi dubarte erganjuwwa qachchi giddi'a ergite,

qephphichcha booncho'n uurte manna yexxe.

4 Isenna qalbeeffachchotixxa xe'ya afeeka duuchchaa,

«Oosommatineeki duuchchi kaba'a amme!» hite.

5 «Amme qophpheesseennexxa ita itte!

Bulbuleennexxa bookanna ha'we.

6 Ha'nooka gowwummatika ora waale hedhotinna hexxinaan;

qalbeeffachchotike ora'ninna me'we.»

7 Gacifataaka manjo gorsaak duuchchi yowwaake badhaadhaa;

fuggichcha xixaaki duuchchcinna salphinneke alfa.

8 Gacifataaka manjo xixxoxxe'e, atee'e gibaan;

muxxe manjo kinni xixi; atee eeyyaan.

9 Muxxe manjo barsiis, lebee'e muxxe kadaan;

qullichcha manjo barsiis ege'nate lephphaan.

10 Duuchchi Woddika Gootta sodaata muxxummatike ke'iton;

ookkone Woyyichchakanna ege'na'a qalbeeffachchoten.✝

11 Aninni bari atik qeerredhammaxxee,

hexxattoxxi atixxi woggaarinna ati'a lebbendaan.

12 Muxxaloke kaddottole muxxumma atixxi umo atingeeten;

gacifatatoke kaddottolenna ifinni miitatto.

13 Muxxete kada gopha lallabbamaxxe

mitte ege'nanna affemmabaaxxe hawwawwa manjoshshaten.

14 Ise ifike minixxe baxxe'n,

qachchi giddike qephphichcha booncho'n ofoldaan.

15 Ookkoo'n sa'aakara,

sammi hiyye ora ifika me'aakara yexxaan.

16 Isenna qalbeeffachchotixxa xe'ya afeeka duuchcha,

«Oosummatineek duuchchi kaba'a amme!» hitaan.

17 «Mooriinki wodi'i xe'maan;

gollante indeexxi itanna gammachchiissaan.»

18 Insa'ne kinni iseba mareek reyeexxa,

ta'a yexxa'neekirinna reyemmak manni hedheeba hedheexxa egennebaan.