1 Eloki summi lumoxxe karra caalan:

ulfaatatinna sibiljo birrena'ninna worqenaa'ni saxxaan.

2 Duuchchi Woddiki Gootti duuchchingike dadallo kadeemmaxxe'e

dureessikinna hiyyeessi lamiing weli qixxeten.

3 Qaroontichchi manji elobaachcho uudoole sho'omaan:

qalbeeffatabaak kinn eetteneninni guule me'aani: miidhemaani.

4 Arja kadanna Duuchchi Woddika Gootta sodaata: durumma,

lumminnekanna hedho alfissaan.

5 Fuggaalleeyye me'ita'neeke ora'ni utenna fonxoro hexxeen:

lubbo ifixxa heqqedhaak kinn konneechchonaa'ni baajan.

6 Belto atika me'iyyo hasissaaka ora duuchcha iso'o baraachissi:

hedheeke baro duuchcha'ni isoo'o hordofa'ni hedhaan.

7 Hiyyeessi dureessinke erganjon:

maallaqa liqeeffataak liqeessammake garbaken.

8 Fuggoxxa hujaak rakkote haa'maan:

Mageniinxi mufenna isoo'o balleessitaan.

9 Arji manji umo ifingee eebbisemaan:

itatanna hiyyeeyyeti welti qoodemaan.

10 Gacifatammaka fulchitottole:

lolikinna yowwichchi hedhabaan.

11 Ca'axxa qalbe afeeka manjo eeyyakinna haaso'a ege'neeki:

moyanji edo isi eeyyeme'eken.

12 Duuchchi Woddike Goottixxi ille ege'na heqqexxaani:

addatemabaake mannika hiyyichcho kinni isi toliinke assaan.

13 Boose'i «Neenqi gadho hedhe:

orake'ni shiyaan» hiyya'neen.

14 Yabaabulto manjichchoki afo'i dhi'mo balen:

Duuchchi Woddik Gootti mufateeki manji ookko'o ibaan.

15 Oose hundaayyet haakito affe'en:

kutinxi gane kinn insa'ne'e hiissitaan.

16 Karra ca'maak hiyyeessa miicak, dureesake'e uwwa shiqilshaak;

lamiing hiyyoomaan.

17 Muxxetika hiyyichcho dho'o hite caqas:

qalbe atixxanna anxe barachchoba'a hiisedhi.

18 Insa'ne'e godoba atike'n qaabbattottolenna heqqexxottole

insa'ne duuchchiing gammanda.

19 Tennexxe'e adde atixxi Duuchchi Woddike Gootta'n kaddaasha,

telcho ani atee'e umo angeninni barachchiisaannen.

20 Gorsatikenna ege'natika konne hiyyichcho

eloxxa barachchuuwwa ati'a borreesseenabaa?

21 Ate'e ergekee hasissaaxxa hiissa uutattoshsha,

dhugaatixxanna addatemeeka hiyyichchuwwa atee'e barachciisannoshshatebaa?

22 Mittelchcho afebaaka hunnati idagi hitoxxe'e:

hiyyeesake kadeemmaxxe'e: rakkichchakanna weldeennate'ni daassitoxxe'e.

23 Duuchchi Woddik Gootti insa'nexxa murte muraan,

insa'nenaa'ni mulqeemmakara mulqaan.

24 Hifatichchi manjinni welti jaalondoxxe'e;

hollaantichchik welti gudditoxxe'e.

25 Adaba isika barattottole:

ifinni ifi sagadhitatton.

26 Annoondetteke hiyyichcho'ni weli aagge anga gandoxxe'e:

liqakee'e annoondoxxe'e.

27 Dandeette hiissa gophphottole

diiphattaxxi taqe ati hundii'ni adhendaan.

28 Edik atiki annuwwi uggeemmaka,

gabalatika kakkichcho goshshoxxe'e.

29 Huja'neexxe hujexxa oge afeeka manjo uudi;

isi moyanjuwwi edo ergatema malee'e afeenge manni'a ergatemabaan.