1 Lolema hexxee'na'a ita ha'wa wo'miteke mini mannii'n,

tima waasa nage'inke mine'n ita'n hedha woyyan.

2 Muxxe erganji goottinke salphichcha belto'n gootta kada,

dayyo mittishshanna dayyuwwati dhaalatika qoobbo alfa.

3 Worqetinna birretiki sibilji giirati hega uudemammashshanni,

Duuchchi Woddik Goottinna manjiinxa qalbe higa uudaan.

4 Fuggichchi manji elobaake manjike haaso'a laqa,

dharichchikinna dhariinke haaso'a caqasa.

5 Hiyyeeyyete'n gacifattootole insa'ne dadeeka Mageno yowwittetteshaten,

wele manjixxe rakko'n gammadaakinna xixemebaak gataba'a.

6 Oosetixxi oose akka'watee kallachaken,

annikinna ama oosetee'e hirreti hirboora.

7 Eloki haaso'i oossoommataake'e elabaan,

lame afo'iki galchalloke fa'i hitta elata!

8 Matta uwwaake manji'a gojotike miyishaten,

isi mare geyeeba duuchcha yaane isi'a qajeelda.

9 Balleessa laakko'abaak eeyyate nossa,

lebe ise'e haaso'aak kinni jaaluwwa ifinaa'n bayyissa.

10 Oossoommataak manji dhibbale kutik ganeme barataa irra,

qalbeeffachcho afeek manji mitte xixichchinn barata.

11 Fuggichchi manji manjoke'n hunnati ke'a calla halsa,

tennexxe'e godoba jabak erganj iso'n ergema.*

12 Oossoommatek hawwawwummatixxa huje hujaa'naa'ni futti hiyya mannii'ni,

beltanna ise hundii'n shiyendeeke meyyake qeedhanchinni futti hiyya woyya.

13 Eloxxixxa bado fuggoxxa hiissaaka manjo,

fuggoxxi isike minenaa'n gophendaba'a.

14 Lolemate'n geessissaaxxa yaane safaa,

kofemeeka wode'e qunxursatishshate, tennexxe lolake'n geessissaaxxa yaane safendeba edi darre yaane uurrisi.

15 Qullichcha balleessanjoke asse'e balleessanjo kinni qullichchake asse mura

lamiinxi Duuchchi Woddika Gootta diqachchiissa.

16 Afeeka maallaqa muxxumma alfatike ora'n hosisa gophammaxxee,

oossoommataake manjixxe anga'n hedheek maallaqi maa la'o afeta?

17 Jaal jaalo ifika duuchchi wodda eeyya,

dayyikinna ifike dayyi'a rakkoti barike.

18 Qalbeeffachcho afebaak manji liqa hiissisatixxee weli aage anga ganati,

annooma adhdhaan.

19 Lola eyyaak cubbo eeyya,

hulatanna iima qeerrise ijaraak ba'ne ye'edha.

20 Fuggichcha yaada afeeke manji'a eloxxi isi'a kaddaba'a,

dhuga'a haaso'abaakinna rakkote'n ibaan.

21 Hawwawwa belto i'la yaaddo idaqqaten,

hawwawwichchiink anninna gammado afabaan.

22 Gammadaaxxi qalbe eloke qorsan,

yaadik enqema kinni biso xo'a assite'e bassita.

23 Fuggichchi manji dhuga dassatee,

sho'ik matta adhdha.

24 Qalbeeffatak manji muxxummate'n ille ugga,

oossoommataake manjixxi ille kinni kumaba uudda.

25 Hawwawwi belti annake'n yaaddote idaga,

ildeexxe ama'anna ciniintote.

26 Qullichcha manjo mura woxaashsha assa,

yookaan qajeelumma insa'nexxe galchalluwwa jadhafa eloxxeba'a.

27 Ege'na afeek manji haaso'a qusa'ne haaso'a,

qalbeeffachcho afeeke manjik yaadinna ititeeke.

28 Oossoommataak manji midde sammi hiyyeele muxxeek labaan,

mitte haaso'anna bucuqqi hiyya gopheele qaroo manjo labaan.