1 Moyanji Duuchchi Woddike Goottixxe anga'ni hedheen;

isinna dareerake'n yaa'ammake wode'ishsha iso'o eeyyeba'a hiissedhaan.

2 Manji assa'neexxi duuchcha eloxxe iso'ni labbaan;

Duuchchi Woddik Gootti kinn godoba uudan.

3 Tolcha uwwati irra qullummatanna dhugaatixxa murte assa;

Duuchchi Woddika Gootta gammachchiisan.

4 Hollanna kijiba fuggaalleyye mannike adaban;

tinninna cubboten.

5 Yaadik jabaate salaliki hujeeki hegeri'a geye gataachocho alfaan;

wiinamik hujak hiyyoome gataan.

6 Dhara dhugaate assat alfinaaxxi karra,

guulde saxxammaxxe diidalloshshanna shiltammaxxe fonxoroshshaten.

7 Fuggaalleeyye eloxxa yaane assa gibbammaxxe'e

manjoke'n hunnati ke'a insa'nexxi insa'ne filte balleessita.

8 Cubbaalleeyye daban calla eetan;

qajeel manjik adab kinn toggichchaken.

9 Afoollitte arenni welti mitte mine'ni hedhati irra

miiinxe heelichchoke irga'n hedha woyyan.

10 Fuggok manji xaqaro assate eeyyan;

ayyeenna mararabaan.

11 Gacifataak manji ganemaa wodda,

weli ege'na afebaak manji muxxete kadaan;

qarchi manji barattoole ege'na alfa.

12 Qullichchi fuggaalleeyyetika mine hubate uudaan;

daba hujammakara balleessa.

13 Hiyyeessiinxa raare laqa gibeek mansha abixxoole;

isinna raaraa wodda reebaaka alfaba.

14 Sho'ik uuneexxi uwwa mufe waalchissaan;

udumii'n uunaak mattinna jabaxxa aare sammi assaan.

15 Dhugaatixxa murte muraa wodda,

qulliyye gammaddaan;

fuggoxxa hujammaki kinn raanka.

16 Qalbeeffata gophe gugguffataake manjik

muuxam reyote.

17 Xoo'mamik hedha hasaak hiyyooman;

woyinetixxa bookanna ha'yo eeyyaak haranga duromaba'a.

18 Fichchi manji qulliyetee,

amana afebaak qajeela mannixxa bakka xixema.

19 Afoolittenna aarrameete arenni welti hedhati mannii'n

qiila gammoojje'n hedha woyyan.

20 Qarichchi manjike mine'n elolla itanna buur camemee hedhaan;

gowwi manni afebaak kinn afeenga faangesse biraan.

21 Qullummatanna jaalala hordofaak,

hedho, durummatanna ulfinna alfaan.

22 Qaroontichchi hunnameyyetike qachchika dalla'a enqe e'yaan,

insa'ne addantemmaxxa kolluwwa diigaan.

23 Afo'okanna laagada ifika heqqedhaak;

daggaaxxe balana'ni ifi gatilsaan.

24 Hollaammessinna kijiballi manji, «Hawwawwake» hiyyemman;

adabi isik duuchchi hollati barqaaqeken.

25 Boose'i manji huje hiiqammabaaxxee,

gaabe iso shilta.

26 Kunni manji duuchchi wodda yoraaxxi heddo yaane alfateeten;

qajeel manji kinn ani'a gatuun hiyyabaan.

27 Jallichchi manjik tolchi

Duuchchi Woddika Gootta gammachchiisabaan;

elobaake yaadinni shiqishaa wodda fa'i caala diqachchiisa!

28 Dhara dhugaa kulaak ba'aan;

dhugaa haaso'aak kinn galaan.

29 Fuggichchi manji elobaaxxenni manjoke'n ille fulcha;

qajeel manji kinni hujaachcho xexxe'ate huja.

30 Manji ifike beekkumin, qalbeeffachchotinna hedinot;

Duuchchi Woddika Gootta ifinaa'n hoyyedha dande'abaan.

31 Fadhachchi lolake'e qophpheesema;

injifachcho kinni Duuchchi Woddike Goottinaa'nite.