1 Muxxe manjichcho mine ifika ijaartaan,

oossommataaxxi manjichcho kinni ifixxe anganninn diiggaan.

2 Me'inji isik qajeelake kadeek manji Duuchchi Woddika Gootta sodaataan,

ori isik dabaalesa kadeek manji kinni iso'o tufata.

3 Oossoommataak manji afo'inginn gane adhdha,

muxxe manjik haaso'i kinni yo'oxxenaa'ni isoo gatisa.

4 Qotiyyo hexxebaaba midha hexxaba'a,

qottiyyotixxe hunnanni kinni lummoxxi midha afenda.

5 Addatendeexxi dhuga sobo haasottaba'a,

dhariinxi dhugaa kinni dhariki dhugaa kulda.

6 Gacifataaki manji muxxoomma halchaa male'e alfaba'a,

qalbaameeyyetee kinni ege'na shollaqicininni afenda.

7 Isonaa'n ege'natika haaso'a alfa gophphattaxxee,

oossoommataake manjonaa'n bayyati.

8 Qarumma manjinxxi muxxumma ora ifika qalbeeffachchote,

gowwi mannixxi gowwumma kinni sobemate.

9 Gowwi manni cubbo hujaa wodda gacifata,

qajeeli manni kinni cubbo insa'neexxi gattowwaal hiyyendo'a yora.

10 Mitti mitting manji ifi ifixxe qalbetixxa yaado ege'ne'e,

gammashsho isixxanna ayyinna isinni qoodemaba'a.

11 Fuggaalleeyyetiki mini diigema,

qajeeli manniki duunkaani kinni hedheeshshann hedha.

12 Manjoke'n eloke labaake ora hedhe,

udumi uduma kinni reyotiba iyyemara.✝

13 Manji oso'la'inni ifi giddo yaada dande'a,

gammashshotinna yaadoti muuxema dandeeta.

14 Qullummatike oranaa'n higaaki ifixxe hujeka hira adhdha,

qajeeli manjinna ifinxe hujeka hira alfa.

15 Gowwi manji haasonnexxa duuchcha dhuggate hiyyee adhdha,

qaroontichchi manji kinni ifika me'injo hubate uuda.

16 Muxxe manji xexxe'ate fuggoxxenaa'ninna bayyata,

oosommataaki manji kinni wiinamik afeeshshanni me'a.

17 Hifattichchi manji gowwiinxe huje huja,

xaqartichchi manjinna gibema.

18 Ege'na afebaak manni ege'na gophatika hira alfa,

qalbaameessi manni kinni ege'na kallachchiinsha uggudhdhaan.

19 Fuggaalleeyye qajeeli manni edo,

cubbaalleeyyenna qulliyyetixxe wuddumme edo heeshshi hitaan.

20 Hiyyeeyye jaaluwwi insa'neki midde insa'nee gibaan,

dureeyye kinni heddo jaaluwwa affe'en.

21 Ollalcho tufataak cubbo hujeeke,

hiyyeeyye gargaarak kinni eebbisemaake.

22 Fuggoxxa asso'a hedaak dedhaamessake,

eloxxa asso'a hedaak kinni eeyyaakanna addatemeeka jaaluwwa afaan.

23 Eloonne hunjeechchi duuchchi la'o iyyedaga.

Odo duwwixxi kinni hiyyummate'n iyyemarta.

24 Muxxe mannixxi durumma insa'nexxe ulfaachcho;

oossoommataake mannixxi oossoommachchotixxi gumma kinni oossoommachchote.

25 Dhugaat dhugaa kulaak lubbo anjira,

dharik dhugaa kulaak kinni sobaaleessake.

26 Duuchchi Woddika Gootta sodaataak jabake golla afee,

oose ifixxeenna irkote.

27 Duuchchi Woddika Gootta sodaata hedho utaaxxe muummen,

manjo reyotixxe fonxoronaa'ni anjirtaan.

28 Ardiinxi birasa'ne moyanjokee ulfinnake kaddaa wodda,

ardiinxi heeno'ma kinni galchammake moyanji'a ba'nete.

29 Ossaameessi manji lumoxxe qalbeffachcho afe'en,

hiffatichchi manji kinni gowwumma ifixxa leellishsha.

30 Nageelte sammo manjixxe hedho'a fayyate,

hinaaffe kinni hedho luuxxiinsha itta.

31 Hiyyeeyye rakkisaak manji insa'nee dadeeka tuffateeke,

hiyyeeyyetee eloxxa assaaki kinni Mageno ulfeseeke.

32 Fuggaalleeyye fuggo huja insa'neexxi insa'nee ibissa,

qulliyye kinni reyotixxa yannanna midde golla affe.

33 Muxxumma qalbeeffachcho afeeke mannixxe qalbe'n galda,

oossoommataak manni kinni isee ege'neba'a.

34 Qullumma arda lummissa,

cubbo kinni hoonee ardanna salphissa.

35 Muxxe erganj moyanjo ifika gammachchiisa,

shookishshaak erganji kinni moyanjo mufachchiisa.