1 Anxe oose! Anniinka gorsa laqqe;

dho'o hitine caqqassineexxi qalbeeffachchotanna alfe.

2 Ani ha'no'a eloxxa barachchiisa uwwannon;

tennexxee anxe barachchiisa'n mee ga'ma'mi hiyye.

3 Ani anke annike mine'n reefi shiixoke belto,

anxe ama'aanna mittelchchoke kadeennaa wodda,

4 Anni anki anee'e hiyya'ni barachchiisaamma qici,

«Hiyyichcho anka duuchcha atike godoba'n galchedhi;

anka ajajaaranna heqqedhi, hedhoti hexxatton.

5 Muxxumma alfi, qalbeefachcho abixxi;

hiyyichcho anka mee dedhi, iso'ninna mee ga'ma'mi hiyyi.

6 Muxxumma mee waal; iseenna ati'a gollake kaddaan;

isee eeyyi, ateenna heqqitaan.

7 Muxxumma quba saxxeexxe yaanen; tennexxee muxxumma alfi;

affetteelchcho duuchcha hira atee laqqoolenna qalbeeffachcho horat.

8 Muxxumma kubbisi, isenna atee kubbissaan;

muxxumma hanqalfi, isenna atee'e ulfeessitaan.

9 Isenna atike umo'n gaachchanna uwwaaka daraariinka seesa guggu'lishshaan;

ulfaatatike kallachcha ati'a kaddaan.»

10 Anke beltoo! Hiyyaannexxa caqasi, kulaanexxanna laqi,

atik hedhoti barinna qeerredhaan.

11 Muxxummatika ora atee barachchiisennen, toggichcha ora'ninna atee akeekannon.

12 Me'ittatto wodda ori ate'n cu'matabaan;

gongittottolenna guggufattabexxon.

13 Barattettexxa barachcho jabeessite abixxi, mee isee wocci assi;

barachcho atixxe hedho kaddemmaxxee duute isee abixxi.

14 Cubbaalleeyyetika ora lekka atixxi meenni haxxowwaal;

fuggaalleeyyetika me'injonna me'itoxxe'e.

15 Isonaa'ni bayyati, meenni iso'ni me'i;

isinaa'n illee iima higgetexxi ora atika me'i.

16 Fuggoxxa assa gonphoole diiphi insa'nee adhdha gophammaxxee,

manjo guggufachchiisa gonphoole diiphi insa'ne'ni wilabaan.

17 Fuggoxxinna hunnat manjoke'n ke'na,

insa'ne'a itatishshanna ha'watishshaten.

18 Qulliyyetik ori saafo'ii qico'n,

wa'inne leba'ni me'ammake soodimariinke ifishshaten.

19 Fuggalleeyyetiki ori kinni dimma dukanashshate;

insa'nee guggufantaan maachchi insa'nee ibiseexxanna egennabaan.

20 Anke beltoo! Hiyyaannexxa caqasi;

anaka hiyyichchonna dho'o hite laqi.

21 Hiyyichcho anka atixxe ille edii'n mee bayyisi,

godoba atik giddonna galchedhi;

22 Hiyyichcho anka qalbeeffataakee, hiyyichchi anki hedho,

manjiinke bisi duuchchi'aanna fayyaten.

23 Duuchchiinxe yaane iimi darre qalbe atixxa heqqedhi,

qalbe hedhotixxe muummen.

24 Dabiinki haaso'i atenaa'n fuloqqe'e;

lame afo'ikenna kaddoxxe'e.

25 Yaadi atik toggi hiyyeeke kadowwaal;

middi bita'i'a hitebexxong edi'a uudi.

26 Me'itattoka ora giissedhi,

me'inji atikinna ati'a elaan.✝

27 Middi bita'i'a gortoxxe'e; lekka atixxanna fuggoxxenaa'n heqqi.