1 Caqasse! Muxxumma yexxa'neen; Qalbeeffachchotinna hafuura gikki assite laqissa'neen.

2 Oriin qarqara hexxeexxe gooruwwa hana, weldeennuwwate'ninna uurtaan;

3 Qachchuwwiinba e'yinaaxxe huluwwa qarqara,

wuddummete'n hexxe hafuura gikki assite hitta'n yexxee qic:✝

4 «Koo mannaa! Ye'aannekiqqa ha'note;

hafuura gikki asse'e manjiinka belto duuchcha ye'aannen.

5 Ha'no xe'ya ege'na afineek ege'na alfitino'a baratte;

ha'no gowwoole, qalbeeffachcho alfe.

6 Haaso'aannexxa la'o affeexxa yaane caqasse;

afo'i anki toggitte yaane haaso'aan.

7 Ani fuggoxxa diqataannaxxe'e, dhugaate haaso'anno.

8 Haaso'annoki haaso'i duuchchi dhugaaten;

mittikinna dhari yookaan manjo dedhake'n ibisaakebaan.

9 Qalbeeffachcho afeeki haaso'i anki duuchchi toggichchaken;

ege'na afeeki manninna dedha afebaan.

10 Birretik siblji irra gorsa,

ca'itte worqe irranna ege'na melledhe.

11 Muxxummati hiri fiixeeke kinjuwwi irra fiixxeexxen,

halchitattoxxe yaane duuchchanaa'n isenni qixxo'aachchi mittilchinna hedhebaan.

12 «Ani muxxumma qarummati welti galannon;

ege'natinna elo yo'oxxa gargar mella aniilchon.

13 Duuchchi Woddika Gootta sodaata fuggoxxa gibaten;

ani holla ifi dukatanna fuggoka adaba,

manjo dedhisaaka haaso'a gibanno.

14 Gorskinna dhugaatixxi murte aniilchon;

qalbeeffachcho ante; hunnatanna afeenne.

15 Moyanjuwwi aninni moya,

akeekisanjuwwikinna toggichcha seera aninni fulcha,

16 Ja'laabuwwi aninni galcha,

buttatiki galchalluwwi duuchchi aninni toggitte murte mura.

17 Ane'e eeyyaka duuchcha aninna insa'nee eeyyanno,

adda halsaakirinna anee alfa.

18 Durummatinna ulfinni,

guutabaaxxi karranna yaane duuchchixxi qajeela aninnite.

19 Ani gicannok gici ca'itte worqenaa'ni,

uwwannok hirinna hedheen hiyyemaake birret sibljonaa'n sa'aaken.

20 Ani qulummatike ora'n ma'annon,

seeriinxe weldenna'ninna tarkaafatano;

21 Anee'e eeyyakara duroonsano;

mine insa'neeke'ninna karra wonshanno.

22 «Duuchchi Woddiki Gootti edo olma duuchiingechchi edo,

ifixxe hujeke safo'n taakaba anee dade.✝

23 Butta dadendebaa edi darre,

bire olminaa'ni hariiremmennen.

24 Lumollamma abbaayyuwwa edi darre,

wodi'iinxi muummuwwa phu'issebaa ediga'ma ani ilemenne;

25 Koobuwwa dadendebaa edi darre,

tullichuwwakeenna ediga'ma ani ilemeennen,

26 Butta yookaan buttatik diiduwwi,

yookaan ediseexxi buttatixxa buko dadendebaa edi ga'ma ani illemenne.

27 Mageni lumolla abbaayyuwwa iimi darre iima dhisee wodda,

ani ookko hedhennan;

28 Duumanchuwwa iima uggee wodda,

lumolla abbaayyuwwaxxa muummuwwa dadeedee wodda,

29 Abbaayyuwwatixxa gabala gabale uggee wodda,

wodi'ikinna ajaja isika sa'abaashsha,

Butta booso isenxe'n gabalee wodda ani ookko hedhennaan.

30 Ookkone wodda ani isibira lumoke ogetike hujallomman.

Barra barra'n isoo gammachchiisa'ennan,

isi edonna duuchchii wodda gammadaannan.

31 Isi dadeexxe buttatixxee gammadaannan,

manjiinke beltixxeenna illillissaannan.

32 «Yoona anxe oose! Hiyyaannexxa caqasse;

ora anka heqqedhaake mannixxa wodo.

33 Gorsa anka laqqine muxxete kadde;

ga'ma'minna hitinoqqe'e.

34 Barra barra'in baxxe anxe'n dagaakee,

hula anxe'n anee'e heqqedhaakee,

hiyyannoxxanna caqasaake manjixxa wodo.

35 Anee'e alfeeki duuchchi hedho alfammaxxee'e,

Duuchchi Woddiki Goottanaa'ninna elle alfaani.

36 Anee alfa gopheeki kinni umo ifike miidha;

anee gibaakirinna reyote eeyaan.»