1 Manji herrega herregaan;

yaane kinni herreg iikki hujete'ni hosaak;

Duuchchi Woddik Goottinna eetti'i uwwa wodda callan.

2 Manjoke'e huje duuchchi ca'ittete fakkaatte leellitaani;

ookkone yaadika ke'injo kinni Duuchchi Woddiki Gootti memmekisee uudaani.

3 Huje atixxa duuchcha Duuchchi Woddike Gootta'ni magaanne uwwi;

heddattoxxi duuchchi ati'a qajeeldaani.

4 Duuchchi Woddiki Gootti duuchchiinxa yaane ifi'a afeeke yaadi'a dade'eni;

fuggaalleeyyetanna midde ba'netixxe barra'a qophphesseeni.

5 Duuchchi Woddiki Gootti hollaaka manna duuchcha jibbaani;

insa'neenna xixenshatenaa'ni gantabaaxxa dhugaandinni ege'ni.

6 Jaalalatinna addatenshati cubbo gattowwaali hiyyendaani;

Duuchchi Woddika Gootta sodaatati manji fuggoxxenaa'ni bayyataani.

7 Manjiinki me'inji Duuchchi Woddika Gootta gammachchiisaa wodda;

naaphuwwi ifikinni midde mitteba nage'iki he'naashsha assaani.

8 Dhugaati alfinaaxxi shiixxoxxi yaane;

fuggoxxinni alfinaaxxa lumoxxa karra saxxaani.

9 Manji hedaani;

yaane kinni hedeexxi isi'a muuxxendaaki Duuchchi Woddike Goottixxe muranniten.

10 Moyanji murte muraaki Mageni baalloonseeke baalloominniteni;

muraaxxe murte'ninna dedhi afemabaani.

11 Dhugaatixxi kiillonna safaranji Duuchchi Woddike Goottikeni;

subbi giddo hedheeki safaranjuwwi duuchchinna isixxe hujeni.

12 Fuggoxxi huje moyaanjuwwa jibbissaaxxeni;

mootumma jabaatte hexxaaki qullummatiteni.

13 Moyanjuwwi dhugaatike haaso'a'ni gammadaani;

dhugaa haso'aaka manjonna eeyyaani.

14 Moyanji aare manjo shilchisaani;

muxxe manji kinni aare isixxa qiidisaani.

15 Moyanjinki albi farri hiyyaa wodda hedho hexxeeni;

isinni elaanna,

mayetixxe yannake xeeninke duumanchishshaten.

16 Worqe alfati irra beekkuma afate saxxaani;

birretika sibiljo alfa mannii'ni ege'na alfa woyya.

17 Qajeeli mann fuggoke oranaa'n bayyate'ekeni;

me'injo ifika giissedhaki manji lubbo ifixxa heqqedheekeni.

18 Holla ba'nete'ni geessissaani;

ifi dhadaake manji'a edisaachchi ibateni.

19 Hollaameeyye saandemmalcho isenni welti qoodemma mannii'ni;

ifi heeshshi assine rakkiyyeti welti hedha woyyani.

20 Gorsa laqaaki duroomaani;

Duuchchi Woddike Gootta'ni adde assedhaaki eebbisemeekeni.

21 Muxxeeki manji qalbaameessake hiyyemaani;

gammachchisaaki hiyyichchuwwi ege'na barsiisaani.

22 Qalbeeffachcho maallaqake assedheeke manji'a hedhotixxe muummeni;

gowwumma kinni oossoommataake manna'ni xixichcho geessissaani.

23 Muxxe manjixxi sammo isi hiyyaaxxa barsiissani;

ege'nanna isi'a lebbaani.

24 Eloki haaso'i malebinsha xe'maani;

manjokanna fayyisaani; miccoke'ninna aagaani.

25 Manjoke'e eloke fakkaataaki ori hedheeni;

muuxamake'ni kinni ba'netibaa dhdhe me'aani.

26 Hujallo barrate'ni itaaxxa ita halsa jabaate hujaashsha assita;

solo'ikinna jabaate hujaashsha assaani.

27 Woyi fulabaaki manji fuggooxxe hedaani;

haaso'i isikinna bubbaaxxe giirashshateni.

28 Fuggooki manji lola ke'issaani;

hamataaki manjinna addatemeeka jaaluwwa gargari hiissaani.

29 Hunnati manjoke'n ke'aaki olla'a ifika sobe'e;

elobaake ora'ni akeekaani.

30 Qiniffi hiyyaaki manji fuggoxxa hedeekeni;

suume ga'medhaaki manji fuggoxxa assani.

31 Arree ulfinniinke kallachaani;

isenna afendaaki qullichcha manjo'niteni.

32 Worbi manji irra ossaameessa manjo sa'aani;

heddo qachchuwwa lolle injifante abidati irra ifi heeshshi assa woyyani.

33 Mann fedhi Duuchchi Woddike Goottiinxa ege'no'a hixa ibilsaani;

murte duuchcha muraaki Duuchchi Woddike Goottani.