1 Kunniir Yihudak moyanji Hizqiyaasik manni welbaa'ni bukki asseeka Solomoonika mammaassuwwa.

2 Magen shasha buqaammaxxe'e ulfoten; yaane file findiga moyanjuwwake kinn lumminnekeni.

3 Moyanjiinka godoba ayyinna ege'na dande'abaan; moyanjiink hedum qeerrexxeexxe iimuwwashsha, ittanni buttin hundixxe dhi'moshshaten.

4 Birret sibiljonaa'n ciila hoyyi;

giissammakinna ca'a assedhaan.

5 Moyanji edii'n fuggaalleeyye fugussi;

moote isixxinna qullummat jabaatte hexxaan.

6 Moyanji edo ifi lummissoxxe;

lumolli mannixxe oddo'n hedhate'e gaabbitoxxe'e.

7 Atee'e lumoke manji edo shookisheexxi mannii'ni:

umi isingininni, «Amo lumoba konnoo ofo'li» ate'e hiyyeele woyyan.

8 Atinna ille atixxi uudeexxa yaane duuchcha iso'o murtetixxe songoba'a mudammiki aaxxe martoxxe:

jaali atiki ate'e salphisoole

dokko maa kaddatto?

9 Umi atikixxe yaane'a jaali atikinni welt morondatto wodda;

wele manjika shasha diiggoxxe'e.

10 Iita kada gophphoole tenne'e laqaak atee shookishaan:

ifi heqqexxabexxoke kaddoottole elobaake summa ate'ni buuraan.

11 Eloxxe yanna'ni kulemeeka hasisaaka hiyyichcho,

birreti sibiljinn hujendeexxe qore giddo hexxeexxe worqetixxe gummashshateni.

12 Muxxee manjika xixichcho laqaakixxi mansha worqe

yookaan eloxxe worqeke seessishshaten.

13 Mayetixxe yanna'ni kaadetiki qiide wodi'i hashubbi assammashsha;

addatemeeki erganji ergemaakee iitandeni:

goottuwwinka yaada iittanni ti'ni asan.

14 Uwwabaanxa yaane uwwannon hiyye ifi lummisaak manji,

xeena afebaake duumanchishshanna diidalloshshaten.

15 Ossunteti moyanjiba'a shiqa moronsiisaaxxa jabaxxa yaane qiidissaan:

akeekisanjuwwakanna yaadiki mitte kandaashsha assaan.

16 Malebo alfitatto wodda miketi iti,

bira sa'oole ho'o assaan.

17 Atike jaalike miniba'a amma ammanni martoxxe,

uude uude hiyyoole ate'e jibbaan.

18 Jaalo ifike'n dhugaa dhariki kulaaki manji

wolaantichchiinsha, siqqo qaraxxe gabeshaten.

19 Rakkoti wodda addatemabaake manjo'ni addata,

le'miteexxe issonni incatishshanna naaffe'exxe lekkann me'atishshaten.

20 Yaadeeke manji'a faaro faarsa,

boojetixxe barra'ni seemma fulchineeke manjishshanna

madate'ni maxine woreeke manjishshaten.

21 Atik naaphi solo'woole itisi,

dheebo'woole ha'wisi.

22 Tenne'e assiyoti umo isike'n giira wortetteshshaten;

Duuchchi Woddik Goottinna hira ati'a uwwaan.

23 Middii'ni gandaaxxi diidallo xeena yexxammashsha;

afoollichchi arrabi mufete'n geessisaan.

24 Afoollitte melaallenni mine mitte'n hedhati irra;

miniinxe heellchoke kasa'ni hedha woyyan.

25 Bayyi'ni daggaaxxi eloxxi odo,

dheebotteexxa lubbo dheebo fulchammake qiida wodi'ishshateni.

26 Fuggo manji'a guluffataaki qullichchi manji;

boorotteexxe muummeshsha yookaan baleessishshaten.

27 Malebo bira sa'isse ita eloxebaan;

ulfinna ifika halsa lummissabaan.

28 Umo ifika dedhaaki manji;

kinjiink dalla'i diigemeeke qachchishshaten.