1 Wele manninni welt gala eeyyabaak manji,

umo ifikixxa halcha calla hordofa,

toggichcha yaadanna midde moroma.

2 Oossoommatak qalbeeffachcho welekenaa'n alfa iso'o goddisaba'a,

isi ifike yaada calla haaso'a eeyya.

3 Fuggaalleessumma dagga wodda tuffatema dagga,

shookikki welti salphinni daga.

4 Manjiinke afo'onaa'ni fulaak hiyyichchuwwi dhi'motike wode'e,

muxxummatixxi muummenna yaa'ammake wodi'ishshate.

5 Fuggichcha manji'a gamisa,

qullichcha manjonna alfammaka seera hoyyedha eloxxebaan.

6 Oossoommataake manjik hiyyichchi iso'ni lola ke'issa,

afo'i isikinna kuta iso'n idagaan.

7 Oossoommatake manjik afo'i iso'ni ba'ne idaga,

haaso'i isikinna lubbo isinxee fonxoroten.

8 Hamataake manjik haaso'i xe'maxxe itashshaten,

godob giddi'a luqqu'mi hyye e'ya.

9 Huje ifixxa haba gatte hiyyabaak manji,

huje baxxaashsha assammakike dayyon.

10 Duuchchi Woddike Goottik summi jabake golla,

qullichchikinna iso'n mare gollata.

11 Dureeyyetixxi karra insa'ne'a kinjiinke qachchike dalla'an,

heduma insa'nek giddonna dademe da'memabaake qeerrake dalla'ishshate.

12 Ibatixxi angafa ifidukate,

ulfaatatik umi kinni ifi heeshshi assate.

13 Caqansebaang hiissichcho uwwaake,

manji'a gowwummatenna salphinneke.

14 Elagonpheti wodda Kadannochchi hedhebaan hiyyaak yaadi anna kipha,

Anxa mooshshi hiyyaaka yaada kinni maachcho iso'o kipha?

15 Qalbeeffachcho afeek manji ege'na alfa,

muxxe manjixxi manshanna ege'na dho'o hite laqqa.

16 Uwwa uwwemmake manjichchi'a yaane qajeelchita,

lumolli manni edonna iso'o shiqaashsha assa.

17 Murtetiba edise yaado ifika haaso'aak manji,

isoo moromammak dageexxi moronshatika qortuma iso'o qoraa qico'n isi calli dhugaatike kadeeshsha iso'n labba.

18 Hixa ibisa moronsha gatissa,

lame mannixxa moronshanna uurrisaan.

19 Balleessa iso'n gelteek dayyi kinjiinke dalla'i caala jabaken.

Lolikinna kinjiinke jabake cufanishshaten.

20 Manji ifinge haaso'ixxe gumma godda,

haaso'emmaxxe yaane'ninna gammadaan.

21 Afo'i hedho manjinxa fayyisiyyonna balleessa dande'a,

haaso'a eeyyaakinna haaso'eenge haaso'ika hira alfaan.

22 Are aadheek eloxxe yaane alfe,

tinninna Duuchchi Woddik Gootti eloxxa isi'a asse hiyyote.

23 Hiyyeessi shaqqunuteti sobata'ne'e haaso'aan,

dureesi kinni hollati hiissichcho uwwaan.

24 Jaalo bira sa'issedhaa manji, ifi ba'nete'n geessisa.

Dhugaatik jaali kinni dayyo godobika sa'a.