1 Dada Duuchchike Duuchchi Woddike Goottike qoorchcho’n hedhaak,

duuchchiinxa dande’aake

Dada duuchcha ajajaake Mageniinke gaaddis hunda galaan.

2 Duuchchi Woddika Gootta, «Ati anke gollanna anxe kollon; ati anke Mageno ate’n addata’eeneken» hiyyaan.

3 Mageni atee sho’ondeexxe fonxoronaa’ni, qoomaake dhukubanaa’n heqaan.

4 Guchche ifixxenni atee gollaan;

keela isik giddonna sho’ondatton;

xuurameessumma isixxi ati’a wontetenna dalla’ake kaddaan.

5 Alalshitaaxxa hashsha,

barra darbemaaka mogidonna sodaatabexxo.

6 Dukkana giddo lulluggaaxxe bala’a

saafo’a me’itaaxxe ba’ne’aanna shokki hitabexxo.

7 Kumi qarqara atike’n

tommi kuminna middi darre’n ibaan;

atibaa kinni shiqaachchi hedhabaan.

8 Ati kinni ille callin uuddatton;

fuggaalleeyyetixxa xixenshanna affatton.

9 Ati Duuchchi Woddika Gootta ifixxe kollo,

Dada Duuchchika Duuchchi Woddika Gootta qoorchchoke assexxe’eeten.

10 Tennexxee fuggoxxi yaane ate’n daggabaan;

balatinna atike duunkaanike qarqara’n shiqqabaan.

11 Me’itattoke ora duuchcha’n atee heqito’a

erganna ifixxa atixxee ajajammaxxeeten,✝91:11 Mat. 4:5; Luq. 4:10.

12 Lekka atixxi kinjoke’n ganeddabaashsha

erganna anga ifixxen atee qophphi assitaan.✝91:12 Mar. 4:6; Luq. 4:11.

13 Neenqake’ninna buuteti hana haxxatton;

sodachchisaake neenqa’ninna jawweti hana hirbeessittatton.✝91:13 Luq. 10:19.

14 «Anee eeyyemmaxxee ani isoo anjirannon;

anee ege’ne’een isoo gollannon.

15 Anee’e ye’edhaa wodda laqannon;

rakkotixxa yannanna isinni hedhannon;

ookko’ninna isoo fulchannon; ulfeessannon.

16 Qeerraxxa wogga isoo goddisannon;

anjira anxanna uudashsha assannon.»