1 Ani duuchchi wodda Duuchchi Woddika Gootta saadannon;

jajinno isixxinna duuchchi wodda afo'o ankennaa'ninna qoottabaan.✝

2 Lubbo anxi Duuchchi woddik Goottinni ifi jajjaan;

miicemeek manni tennee laqe'e gammadowwaal.

3 Aninni welti Duuchchi Woddika Gootta lummisse;

summa isikanna mittenba kubbinso.

4 Aninna Duuchchi Woddika Gootta halsenne; isinna heeyye;

sodaatannaxxe yaane duuchchanaa'n anee anjire.

5 Iso'n ille uggudhaakiir alba ifaan;

Insa'nenna shoonkabaan.

6 Kunni rakkichchi oodhe;

Duuchchi Woddik Goottinna oodhishsha isixxa laqe;

rakko isixxe duuchchanaa'ninna isoo anjire.

7 Duuchchi Woddike Goottik iimiki erganji,

isoo sodaataka manna qoqqobaan;

rakkotenaa'n insa'nee fulchaan.

8 Duuchchi Woddik Gootti eloke kadeexxa muxxine uudde;

isoo gollake assedheeke manjixxa wodo.✝

9 Isoo sodaataak manni mittechchonna gophammabaaxxee,

ha'no isik woyyichchi manni Duuchchi Woddika Gootta sodaatte;

10 Dargageesi neenqi itaachcho gopheexxi solo'waaxxe hexxaan;

Duuchchi Woddika Gootta halsaake mannanaa'n kinni elloxxi yaane xe'yitabaan.

11 Tee oose! Amme hiyyaannexxa caqasse;

Duuchchi Woddika Gootta sodaata ha'noo barachchiisannon.

12 Hedho eeyyaak,

eloxxanna uudo'a qeera barro halchaak ayyete?

13 Arabo atikenaa'n elobaaxxi fuldabaashsha,

afo'i atikinna sobo haaso'abaashsha heqqedhi.

14 Fuggoxxenaa'n baaji; elloxxanna assi;

nage'a halsi; isoonna hordof.

15 Duuchchi Woddike Goottixxi ille qulliyyetibaa uudaan;

mansha isixxinna soodachcho insa'neexxa laqqaan.

16 Duuchchi Woddik Gootti fuggoxxa assaaka manna gibaan;

buttate'ninna qaabbatemmabaasha assaan.✝

17 Qulliyye ooxxaa wodda Duuchchi Woddik Gootti laqaan;

rakko insa'neexxe duuchchinaa'inna insa'nee fulchaan.

18 Qalbe insa'nexxi enqendeekeeri'a Duuchchi Woddik Gootti shiqoken;

yaade cumummi hiyyeekaranna anjiraan.

19 Qullichchi manjixxi rakko heddoten;

Duuchchi Woddik Gootti kinni tennee duuchchiinxenaa'n isoo fulchaan.

20 Duuchchi Woddik Gootti micco mikita isika duuchcha heqqaan;

mitti miccinna midde enqemabaan.✝

21 Fuggo, fuggoxxa assaake manna shiltaan;

qulliyye gibaake manna'n murte uwwenda.

22 Duuchchi Woddiki Gootti ifike erganjuwwixxa lubbo wodaan;

isoo gollake assedheekeeri'a murte uwwendabaan.