1 Ee, Mageno manni anee shorra'neen, ani'a maraar;

barra duuchcha ane'e lola'n anee miice'een.

2 Naaphi ank barra duuchcha anee shorra'neen;

ifi dukati anee lola'neekiir heddoken.

3 Sodaatanno woddanna

atete addatannon.

4 Hiyyichcho isika saadannoke Mageno addate'eenneni

sodaatabe'non;

maala oddo'week manji ani'aa maassa dande'aa?

5 Barra duuchcha haaso'a anka micciiraan;

duuchchi wodda anee miidhatee'e mallaan.

6 Insa'ne mitteba bukki hinee, rinphaan;

tarkaffe anxanna faana qoraa'ni

lubbo anxanna balleessatee'e gaandaan.

7 Ee, Magenoo! Dabaaleeyye hoone oranna baaje fuldabaashsha assi;

mufe atixxenni gosa gosaka arda butti'a hiissi.

8 Oodhishsha anxa laakkote'eeten;

indiddo anxa xarmuuse giddo cossitee'e uggite'eeten;

kunniichchi atike maxaafa giddo borresseme'eekebaa?

9 Atee ye'edhannoxxa barra

naaphi anki udumi'a higaan;

Mageni aninni hedheexxa tennenni ege'nannon.

10 Kunni aninni welti hedheek Duuchchi Woddik Gootti

hiyyichcho isika galateefataannekenna ulfeessanneke Magenon.

11 Mageno addateennen sodatabe'non;

maala odo'week manji ani'aa maassa dande'aa?

12 Ee, Magenoo! Ati'a werreegennek werreegi ane'n hedheen;

galatiinka tolchanna ati'a tolchannon.✝

13 Hedhotike ifa'n,

Mageni edo mammaremoona'aa,

lubbo anxa reyotenaa'n,

lekka anxanna guggufachchotenaa'n gatiseeten.