Ezirahichcho Eetaanixxa Gence.

1 Duuchchi Woddike Goottixxe jaalalaxxee duuchchi wodda farsanon;

xuurameesumma atixxa ilatenaa'n ilati qico'n afo'o ankenni lallabannon.

2 Jaalala atixxi duuchchi woddi'a qattande hexxaaxxa,

atixxe xuurameesummaxxi uchchumenna iimate'n kaddeexxa haaso'annon.

3 Atinna hiteete qici, «Ani fi'lennekee'e kako aage'eennen;

garbichcho anke Daawwiti'a kakate'eennen;

4 ‹Hitetexxi kako aaggeete qicinna, horte atixxa uchchumetixxe assannon;

moote atixxanna ilatenaa'n ilati qico'n qatansannon✝› »

5 Ee Duuchchi Woddike Goottaa! Iimuwwa mambe'iinxa atixxa huje,

xuurameessumma atixxanna qulliyyetixxe bukki giddo saaddaan.

6 Iimate'n Duuchchi Woddike Goottinni qixxo'aak ayyete hedhe?

Iimatixxe daduwwa giddii'n Duuchchi Woddika Gootta ayyete labaak?

7 Mageni iimatixxi woyyoolle giddo lumoshsha sodateme'eeken;

qarqara isike'n hedheeke duuchchanaa'ninna lumoshsha ulfate'eeken.

8 Ee Duuchchi Woddike Gootta hunna duuchchike Magenoo! Atishsha hedheek ayyete?

Ee Duuchchi Woddike Goottaa! Ati hunnaameessaken;

xuurameessumma atixxi atee qoqqobe'een.

9 Abbaayyatixxa daaqana mootommatixxa hunna affeete;

iseke wodiixxa ganeshshanna sammi assitatton.

10 Re'aabi abbaayyatixxa jawwe,

yakkemeemmalchchishsha cancaqqette;

jabaxxe atixxe hirrenni naapha atika xeertette.

11 Iimuwwa atixxe, buttatinna atixxen;

buttatixxinna ise giddo hedheechchi duuchchixxi hundaayye ateten.

12 Middakanna bita'a dadetek ateten;

Taboorixxinna Herimoonixxi koobuwwa summa atikee illillisaan.

13 Atixxi hirre hunna affe'eexxen;

anga atixxi jabaxxen; middixxi atixxi anganna ulfate'eexxen.

14 Qullummatinna dhugaa mura atixxe mootexxe uchchumman;

jaalalatinna xuurameessumma atilchchon.

15 Ee Duuchchi Woddike Goottaa! Atee magenoofachcho ege'neeke,

atixxe elleke ifi giddo mammaremaake mannixxa wodo!

16 Insa'ne barra duuchcha ate'n gammandaan;

atixxe qullummanninna ulfeessemaan.

17 Ati insa'neke uuduudike gaachchanna kaddetaxxe'ee

atixxe ellenni injifachcho no'aa uutteten.

18 Wonte no'oxxi Duuchchi Woddike Gootta kaddemmaxxee

moyanji no'okinna umo insiingee Isira'eelike woyyichchan.✝

19 Konneechi edo waleellati haasote'e

xuurameesa atika arda hite'eeta qici: «An isoo goota manjo gargaarenne;

ardi giddii'n fi'lemeeka isoo'o quba sa'isenne.

20 Anka eragaanjo Daawwitii'i alfenne;

anxa woyyitte zayitenna iso'n hariirenne.✝

21 Anga anxi isoo kiphphaan;

hirre anxinna isoo jabeessitaan.

22 Naaphi isoo anga aadhabaan;

fuggaaleessi manjinna isoo salphisabaan.

23 Diina isikaara isi edo butuchchannon;

isoo gibaaka duuchchanna butta ibisannon.

24 Xuurameessumma anxinna jaalala anxi isinni welti hexxaan;

summa ankenninna injiffachcho alfaan.

25 Abaayyuwwa anga isixxi hunda

galaanuwwakanna middixxe isixxe anga hunda galchannon.

26 Isinna anee'e, ‹Ati aneke annan, anke Magenon;

anjiremannoxxe anxe rassan› hiyyaan.

27 Aninna isoo'o anke angafa belto assedhannon;

buttatike moyanjuwwi caalanna ulfaataan.✝

28 Isi'a afennexxi jaalala duuchchi woddixxen;

isi'a aagennexxi kakonna addatendee hexxaan.

29 Horte isixxa duuchchi woddi'a,

moote isixxanna iima hexxeeke bari qico'n dhaabannon.

30 «Oose isixxi seera anka saxxoole,

ajaja anke'n gala gophoole,

31 Murte anxa qaxxaamurtoole,

ajaja ankanna ulfeessa gophoole,

32 Cubbo insa'nexxee'e insa'nee ganannon;

balleessa insa'nexxeenna insa'nee jiraafet xixannon.

33 Jaalala anxa kinni isonaa'n hiisedhabe'no;

xuurameessumma anxanna xe'yishabe'no.

34 Kako anxanna diigabe'non;

anke afo'onaa'ni fuleeka haasoanna jijirabe'no.

35 Mittele woyyichcha anke summinni kakate'eennen

Daawwitii'i sobabe'no.

36 Horte isixxi duuchchi woddi'a,

moote isixxinna ani edo arsho hexxeeke bari qico'n turtaan.

37 Moote isixxi iimate'n dhugaatixxe dhugaa kula kadde

hexxemmaxxe baateshsha duuchchi woddi'a kaasendee hexxaan.»

38 Ta'a kinni hariirtetaka moyanjo tuffate'eeten, gibe'eeten,

iso'ninna lumoshsha mufate'eeten.

39 Atike erganji'a aaggetexxa kako diigge'eeten;

kallachcha isikanna buttinake'n darbite'e isoo shollishshe'eten.

40 Isike qachchika dalla'a duuchchanna banqarsite'e diigge'eeten;

kolluwwa isixxanna fedenshitee birte'eeten.

41 Ora sa'ammak duuchchi isoo saame;

olla'uwwa ifikee'e gacifachchotike kadeen.

42 Midditte diina isikee uutete;

naapha isika duuchchanna gammachchiisette.

43 Isike wolantichchika qara udumi'a wirri assittete;

loli giddonna isoo gargaartebexxo.

44 Gaachchanna isonaa'n hoyyittete;

moote isixxanna buttinake'n ibissete.

45 Dargageessummatika isika baro harunsitetexxi

shooko iso'n oddeesittete.

46 Ee Duuchchi Woddike Goottaa! Tinni haani qico'ni kadda?

Ati duuchi woddi'a ifi shoxxatto? Mufe atixxita giiratishsha bubba'n hexxaa?

47 Bari ank hitte qico harumaake kadeexxa hedi;

manjiinka belto ittanni tolangee daddeete!

48 Reyebaang hedhotike kade'e gataak manji hedhee isi?

Hirreessa hundikenaa'n dandeexxi ifi gatisaakita ayyete?

49 Ee dada duuchhcike Goottaa!

Daawwiti'a xuurameessumma atixxenni kakatetaxxi

olmixxi atixxi jaalalata haba hexxe?

50 Ee dada duuchchike Goottaa! Garbichchi atik hitee qico gacifatemeexxa,

gosa gosake mannixxa cee'manna hitta osse sa'ennexxa hedi.

51 Ee Duuchchi Woddike Goottaa! Atik naaphi isoo yowe'eeke

me'a cee'mende'eke fi'liteteke manjixxa cee'mema uudi.

52 Duuchchi Woddik Gootti duuchchi woddi'a eebbiseme'eeke kadowwaal!

Hmiin! Hmiin!