1 Koo Anke ardaa barachchiisaa anxa caqasse;

mansha ha'nooxxanna anke haaso'iba'a wirri asse.

2 Oliminaa'n sho'ondemmaxxa yaane farri assannon,

mammaasik afo'o anka banata'eennen.✝

3 Tinni yaanenna Lanqennexaarranna egennennaxxa no'ok edik,

annuwwi no'o'n kuleemmaxxa,

4 No'oxxe oose'ni sho'nabe'non;

Duuchchi Woddike Goottixxe hunnaxxaara,

isi hujeexxa lumollamma hujeexxaaranna,

asseexxa mamibe'a yaanuwwaxxaara daggaaxxe ila'ni haasonnannon.

5 Isi Ya'iqoobike ardi'a ajaja uwwe;

Isira'eeli'aanna seera ugge;

oose ifixxa barachchiisaashsha edika no'oka annuwwa ajaje.

6 Tennee asseechchi itti aandaaxxi ilaa tennee egendo'a,

ta'a ilemaak manninna oose ifixxa barachchiisoo'aaten.

7 Konne qicinni insa'nenna Mageno addantaan;

ajajuwwa isikanna heqe'naa malee deenabaan.

8 Edike insa'neeke annuwwishsha,

godoba jabataakenna Magenoke'n jallataake,

Magenoke'n mitte godobinni addatati jabaatebaaka manna,

qalbe insa'neexxi Mageno addatabaake manna kandabaan.

9 Efireemik loliink manni gabe abixxeenni hedheexi,

loliinxa barra udumi'a baaje.

10 Mageniinxa kako dingeexxi seera isikeenna ajajema ginbe.

11 Isi hujeexxa yaane duuchchanna,

asseemmaka mambe'a duuchcha deene.

12 Gibtseeke bogi giddo Tso'aanike diida'n insa'neek,

edik annuwwi uuda'naa'a Mageni insa'ne edo mambe'a asse.✝

13 Abbaayya lameba shateexxi giddii'n insa'nee foosse;

wode'e gimotishsha uurrise.✝

14 Barra duumanchik,

hashsha giiratike ifinninni insa'nee akeeke.✝

15 Isi Qiilla gammoojje giddo rassa dhooseexxi,

dhi'mo abbaayyake wodi'ishsha heenobaaka wode'e insa'ne'a uwwe.✝

16 Muumme rassaatenaa'n phu'issaashsha asse;

wodi'ekanna galaaniinke wodi'ishsha yaase.

17 Insa'ne kinni Dada Duuchchika Duuchchi Woddika Gootta yaadisatee ca'li hine'e cubbo hunje;

qiilla gammoojje giddo Lummoke Mageno'n jalline.

18 Mageno hega uundo'a halchineexxa ita isoo lanqe.✝

19 Magenokanna hamanta'n hinee qici,

«Mageni qiilla gammoojje giddo indannolcho no'aa dande'ee uwwaa?

20 Rassa ganee wodda wodi'i lola'e;

egedhitaa indaannolcho uwweexxi, maalakanna no'aa dande'ee qophpheessaa hiyyatee?»

21 Duuchchi Woddiki Gootti tennee laqeexxi yo'oshsha mufate;

Ya'iqoobike arda'n giira ha'ite; Isira'eeli'ninna mufe isixxi bubbe.

22 Tinninna kaddeechchi insa'ne isoo addata gonpheemmaxxeenna

insa'nee anjiraaxxa addata gonpheemmaxxeeten.

23 Kaddo malee isi iimika duumancha ajaje;

iimatixxa hulanna bane.

24 Ardi ito'a meenna gansiise;

iimatixxa midhanna insane'a uwwe.✝

25 Konne qicinni manni Ergannatixxa ita ite;

Mageni inde goddinaaxxa ita insa'ne'aa uwwe.

26 Isi boroti darree'n diidallo diidaleesitaashsha assee;

hunna ifixxenni bita'i darree'n diidallo ke'isse.

27 Buttiinsha bira sa'eeka maala,

abbaayyatike maanchishsha bira saxxeexxa gogorre arda ifikee xeenishsha gansiise.

28 Insa'neke olla'i giddo dunkaan qarqaara'n gogorre insa'ne'aa harcaase.

29 Isi haalchineechcho duuchcha insa'ne'aa uwweemmaxxee ardi ite godde.

30 Kaddo malee halcha fulebaangi ita afo'onni anfee'naa'a,

31 Mageni insa'ne'n mufate'e jajjaba insa'neeka shiye;

insa'ne giddii'n hexxeen hiyyendaaxxa

Isira'eelixxa lollobbe dargaggeeyenna qoomma shiye.

32 Tinni duuchchi kaddee'naani ardi lebe lebee cubbo huja'nemman;

heddo mambe'uwwa leellishoolenna iso'ni addantebaan.

33 Tennexxee baro insa'neeka uffuu hiyyemammake hafuurishsha harunse;

hedho insa'neexxanna weekenshati muunxaashsha asse.

34 Insa'ne giddii'n manna shiyyee wodda gateeki isiba'a higate'ni ke'e;

aadde aagati mitte godobonni isiba'a hinge.

35 Mageni rassa insa'neexxe,

Dada Duuchchik Duuchchi Woddik Gootti Mageni insa'ne wodeeke kadeexxanna qaabbante.

36 Yaane kinni hinaammaxxi duuchchi soboken;

haasonammaxxi duuchchinna dharakemman.

37 Qalbe insa'neexxi isi'a addatendemmabaan;

Isixxa kakonna heqqe'neemmabaan.

38 Kaddo malee Mageni arda ifikee maraare;

balleessa insa'neexxa gattowwaali hiyyee malee'e insa'nee birebaan;

heddole aare enqedhe;

mufetanna eebbishebaan.

39 Isi gande saxxaammaaxxe diidalloshsha,

manji reyaachcho kadeexxa qaabbate.

40 Qiilla gammoojje'ni me'ele iso'n jallinne!

Gammooje'ni heddolenna iso'oo yaadinse.

41 Insa'enne lenbe lenbe'e Mageno hega uunde;

woyyichcha Isira'eelikanna yaadinse.

42 Insa'nee naaphiinxe anganaa'ni anjiremmaaxxa,

43 Gibtseeke bogi giddo Tso'aanke diida'ni assexxa masonna mambe'a deene.

44 Isi insa'neke galaanuwwika wode'e mundete'n jiijjiire;

tennexxe Gibtseke bogik manni muumetika wode'e asse ha'wwaa qico gophe.✝

45 Insa'nee ga'maaka woraancha insa'neeka boga barbadeessaaka,

raachchuwwa insa'ne'n wocci asse.✝

46 Midha insa'neexxa koro'miisi

hiddichchuwwa insa'neeka awwaaneessakee sa'ise uwwe.✝

47 Insa'neeka Woyinetika hiddichchuwwanna kaadeti,

balasetika haqichchuwwanna qorriki balleesse.

48 Lalo insa'neka kaadeti,

hore insa'neka banqoti shiyye.✝

49 Isi bala ibisaaka ifike erganjuwwika sannachcha yo'oshsha sodachchisa'neexxa ifixxa aare,

jabaxxa mufe ifixxanna,

rakko insa'ne'n wocci asse.

50 Isi aarete'e ora bane;

lubbo insa'nexxa reyotenaa'ninna gatisebaan;

yaane kinni balati rennaashsha sa'ise uwwe.

51 Kaamixxe horteka karri banuwwa kadeekaara Kaamike duunkaana'n

Gibtseeke boga'n insa'neeka labbaka angafuwwa duuchcha shiye.✝

52 Arda ifika fulcheexxi gedhebiinsha bobbaase;

qiilla gammoojje giddonna insa'nee akeeke.✝

53 Nage'ik insa'nee'e akeekemmaxxee shookebaan;

yaane kinni abbaayya naapha insa'neeka liqinsite.✝

54 Ifike woyyichcha bogiba'a,

middixxe anganni injifate'e adhdhemmaxxe koobaba'aa insa'nee iyyedage.✝

55 Isira'eeli edii'ni gosa gosaka arda shore;

insa'neeka boganna insa'nee dhaalchisee;

minuwwakanna arda ifike Isira'eeli'a uwwe.✝

56 Yaane kinni ardi isiki Dada Duuchchike Duuchchi Woddike Gootta Mageno'ni jalle;

isoonna hega uude;

ajaja isikanna muuxebaan.✝

57 Yaane kinni annuwwa insa'nekishshanni jalliyyetenna ajaajemmabaake kande;

dabaalette gabeshsha addachchiisabaake kande.

58 Mageno ege'nebaak mannixxe magenoofachchotixxe baka'ni magenoofatati isoo mufaachchiinse;

fakkuwwa magenoofatatinna hinaafaashsha assine.

59 Mageni tennee laqee wodda mufate;

Isira'eelinna haranga waale.

60 Manni giddo uuriseeka duunkaana

Seeloka ifika galduma waale.✝

61 Isi hunna ifixxenninna gaachchanna ifikenni leellatike beessisa kade'eeka Kakkotika Taabota

naaphi booji'o'aa sa'isse uwwe.✝

62 Arda ifike'ni yo'oshsha mufate;

bagedoke'ni muudaashsha asse.

63 Qee'lo insa'neexxi duuchchi gubende rerrte;

dubari insa'neekiirinna aadhaaka gophe.

64 Qeese duuchchi bagedik rerte;

insa'neexxi aruwwa insa'ne'aa oodha dandeetebaan.

65 Ookkoneechchi uduma muuxamake'ni Dada Duuchik Gootti diiphokenaa'n ke'eeshsha dammaqe;

woyyinetixxa booka ha'weexxi onno'ammake janni manjishsha ke'e.

66 Isi naapha ifika gane udumi'a hiissexxi

duuchchchi woddika shookonna insa'ne'n oddeesse.

67 Yooseefika duunkaana tuffate; Efireemixxa horte fi'lebaan.

68 Yaane kinni Yihudaka minenna yo'oshsha eeyyeexxa Tsiyoonixxa kooba fi'le.

69 Ookkonna qeerraxxe tulloshsha ifika woyyichcha mine ijaadheexxi

duuchchi wodda hexxammaxxe buttashsha jabeesse.

70 Garbichcho ifika Daawwitii'i fi'le;

gedhebiinxe allalenaa'ninna isoo adhdhe.✝

71 Gedhebiinxe allalenaa'n fulcheexxi arda ifike Ya'iqoobii'i,

Isira'eelii'i ifixxike allalisanjo asse.

72 Daawwitinna mitte godobinni insa'nee allala'ni,

beekkumikinna insa'nee akeeke.