1 Ha'noo qulliyyee! Duuchchi Woddike Gootta'n gammadde;

qajeeli manni isoo saada hassissaan.

2 Duuchchi Woddika Gootta Masnqoti saadde;

tomme kirreke baganinninna isoo faarse.

3 Haaroxxe faaronni isoo faarse;

biifake meellinni bagana gandinna'ni

gammadikinna illillisse.

4 Duuchchi Woddike Goottik haaso'i dhugaaten;

Duuchchi woddik Gootti hujaaxxe duuchcha'ni addateme'eeken.

5 Duuchchi Woddik Gootti qullummatanna dhugaate eeyyaan;

jaalala isixxinna buttta duuchcha'n wo'maten.

6 Duuchchi Woddik Gootti iimuwwa haaso'a ifiken,

atike ajajinni urjuwwatik sannachchuwwi dademe,

7 Abbaayyatika wode'e mitte bakka'n bukki assaan;

lumollamma abbaayyuwwaka wode'enna mitte bakka'n eelchaanni.

8 Butta duuchcha, Duuchchi Woddika Gootta sodaattowwaal;

buttate'n hedheek ardi duuchchinna isi'aa culphisowwaal.

9 Isi haaso'ee wodda buttaa duuchcha dadende,

isike ajajinni duuchchiinxi yaane ti'ni hite uurte.

10 Duuchchi Woddik Gootti gosa gosake ardixxa mari'e toliinxe assaan;

ardiinka yaadanna bakka geyabaashsha assaan.

11 Duuchchi Woddike Goottik yaadi kinni duuchchi woddi'a hedhaan;

hedumi iskinna ila ilatteeten.

12 Duuchchi Woddik Gootti Mageno insa'neke kadeeke,

geeggo ifike assedhe fi'leeke ardixxa wodo!

13 Duuchchi Woddik Gootti iimatenaa'n uudaan;

manjiinka belto duuchchanna afaan.

14 Ifixxe bakka'n hedheexxi

buttate'n hedheeka duuchcha afaan.

15 Isi manji duuchchixxa qalbe dadeek,

assineexxa duuchchanna ege'naan.

16 Moyanj lumoxxe hunnaka loliinke manna ifi'a afeexxee'e naaphakenaa'n fulabaan;

jannikinna ifixxe hunnake jabeenninni gatabaan.

17 Fadhachchik lollee'e injifatanno hiyye addataa toliinxen;

ifixxe jabaxxe hunnanninna ayyi'anna anjiremabaan.

18 Kunse, Duuchchi Woddike Goottixxi ille isoo sodaatakeeriba'a,

duuchchi woddixxa isixxa jaalalanna addataake manniba'a uuddaan.

19 Isi insa'nee reyotenaa'n gatisaan;

solo'ii sanenna hedhoti insa'nee uggaan.

20 No'o Duuchchi Woddika Gootta addeti heqqe'nanno;

isi gargaarsanjo no'okenna wonte no'oxen.

21 Isike woyyichcha summa'n addante'eennaxxee

iso'n gammanda'eennen.

22 Ee, Duuchchi Woddike Goottaa!

No'o ate'ni addantenneshshanni,

duuchchi woddixxi atixxi jaalala no'o'ni hexxowwaal.