1 Ee, Magenoo! No'ok edik annuwwi

qara insa'neke barro'n

Ati assittettexxa no'o'ni kulee'naa

mansha no'oxxenni lanqe'eennen.

2 Gosa gosaka arda anga atixxenni shorrite'e

annuwwwa no'oka kaassette;

wele gosaka arda balleessitete'e

anuuwwa no'oka kinni ba'lissette.

3 Insa'nee boga adhdhineemmak ifike wolaatichchinniteemmabaan;

injifanteemmakinna ifixxe hirrenniteemmabaan;

Ati insa'nee eettettaxxee'e atixxi middixxi anga,

atixxi hirrenna atike albik ifi tennee asseen.

4 Mageno ati anke moyanjon;

Ya'iqoobixxi horte injifataashsha murtetek ateten.

5 Atixxe hunnanni no'ok naapha dageemmaba'a higaashsha assinnannon;

atike summinni diina no'o'ni ke'eekanna hirbeessinnannon.

6 Ani gabe anxe'n addatabe'no;

wolaatichchi ankinna anee anjirabaan.

7 Ati kinni no'oke naaphinaa'n no'oo anjirtatton;

no'oo gibammakaaranna shookkishshaton.

8 Barra duuchcha no'o Mageniinka ifa janjannon;

summa atikanna duuchchi woddi'a saandanno.

9 Ta'a kinni no'oo gibbe'eeten; no'oo salphisseeten;

no'oke loliinke manninni welti fulada'ebexxon.

10 No'oke Naaphi eddii'n udumi'a hinge bannjannoshsha assittette;

no'oo gibammakiirinna no'oo saame.

11 Dulemaake gedhebishsha no'oo saisite uuttetten;

gosa gosake ardi giddo no'oo xeertette.

12 Arda atika heenochcho'ni gurgurtete;

insa'ne gurguretenna la'o alfitebexxo.

13 Olla'a no'okee geebotike,

qarqara no'oke'ni hedheeke gosa gosake ardi'a oso'lichchiinkenna gacifachchotike no'oo assittette.

14 Gosa gosake ardi giddo mammaakeemmannoke no'oo assittette;

ardikinna tuffeti umo no'o'n le'misse.

15 Ani barra duuchcha salphatenne;

shooke'e aliba anka buqeedheenne.

16 Iitta kadeennelchi naaphi anki ane'ni halo fulaa wodda weli manni anee gacifatta'ninna oso'laa'naa laqeennexxeeten.

17 Tinni duuchchi no'o'n gelteek atee deenebe'nong,

atixxe kako'aa xuurameesumma no'oxxa xe'insheebe'nog tinni duuchcha ano'o'ni gelte.

18 Qalbe no'oxxi atenaa'n udumi'a higgebaan;

lekka no'oxxinna ora atikenaa'n gortebaan.

19 Ati kinni jeedali hosammabaa'a no'oo butuchchite'e hundette;

dimma dukkana'ninna no'oo buqqe'eette.

20 Silaan no'oke Magenika summa deene'eennele

wele magenuwwiba'a anga no'oxxa ke'issine'eennele,

21 Isi godobi giddo sho'ondeexxa afaak Mageni

tennee ege'naa gophaata?

22 Yaane kinni barra duuchcha atixxee'e reyyotixxe rakko'n kiphphi hina'eennen;

duliinke gedhebishshanna uudeme'eennen.✝

23 Ee, Dada Duuchike Goottaa! Dammaqi; mayeeta diiphphatto?

Ke'i, duuchchi woddi'anna no'oo gibbexxe'e.

24 Ati mayee'e alba no'oo sho'exxatto?

Rakko no'oxxanna miiceensha no'oxxa mayee'e deettatto?

25 Lubbo no'oxxi buttini giddo lixxe'een;

bisi no'okinna buttate'ni mexxi hiyye'een.

26 Kexxe no'oo gargaar;

atixxe duuchchi woddixxe jaalala'aanna no'oo wodi.