Faarotikaa Maxaafa 76

Mageniixxa Injiffachcho

Faarsaleeyyetike Sooresi’a Kiraaruwwik Asaafixxa Faaro.

1 Mageni Yihudake boga’n ege’neme’eeken;

summi isikinna Isira’eeli’n lumoken.

2 Dunkaana ifika Saleemi Iyyerusale’mi’n

isixxe mottexxi bakkanna Tsiyoonixxe kooba hanan.

3 Ookko xalaqqi xalaqqi hita’neexxa gabuwwa,

naaphiinka bageduwwa, wontuwwatanna,

wele loliinka miya duuchcha butuchche.

4 Ulfinni atiki hittee qico lumoke;

gaachchanni atik lumolamma koobuwwa caalaan.

5 Jannuwwi boojime’een;

insa’nenna diinphee cookkokki hineemman;

angatinna mitteelchonna huja dandeennebaan.

6 Ee, Ya’iqoobike Magenoo,

atike xixichchonaa’n kexxeexxa insa’ne fadhado ifingenninni inbe.

7 Magenoo, ati sodatende’eeteken;

muffatottole ati edo urraa dande’aak ayyate?

8 Iimate’ni murte atixxa lallabbete;

buttatinna sodaateexxi sammi hite.

9 Ee, Magenoo buttate’ni micemeemmaaka duuchcha wodatee murte’e kexxete wodda butta sammi hite.

10 Mufe atixxi cubbo hujaaka gibbammaxxee ardi atee saadaan;

mufe atixxenaa’n gateek manninna lebeexxi cubbo huja waalaan.

11 Duuchchi Woddika Gootta ha’nooke Mageni’a wereegge;

weereeginneechchonna muuxxe;

qarqara isike’n hedheek duuchchi sodaatema hassiasaake isi’a uwwa shiqishshowwaal.

12 Isi hollaameessa hayyichchuwwa salphisaan;

buttatiki moyanjuwwinna isoo’o sodatee culphisaan.