1 Gowwoole godobi giddo «Mageni hedhebaan» hitaan;

insa'ne elobaake mannanni;

huje insa'nexxinna battoteexxen;

insa'ne giddi'ninna eloxxa assaak mittikinna hedhebaan.

2 Qalbeeffachchoti mammaremaak,

iso'o halsaak hedheexxa uudatee'e

Mageni iimatenaa'n manjiinka belto uudaan.

3 Duuchchiing welebaa wirri hiyye;

duuchchiing mittenba harfo'een;

mittikinna midde eloxxa assaak hedhebaan.✝

4 Manji waasa itammashsha arda anka itaakiir

Mageno ye'edhe egenebaakiir

iikki fuggoxxik hujalluwwi insa'ne haranga barantabaa?

5 Sodaachchiisaxxi yaane ookko hexxeeba'a lumo qico sodaante;

Mageni ifike ardike naaphixxa miqe xeere;

Mageni insa'nee tuffateemmaxxee'e ha'no Mageniink ardi insa'ne'e shookishshinaan.

6 Isira'eeli'i anjiraak Tsiyoonii'n dagummadu;

Mageni ifke ardixxa booji'o hiissaxxa yanna

Ya'iqoobixxi horte illillisowwaal; Isira'eelik ardinna gammadowwaal.