Faarotikaa Maxaafa 45

Aadha Heerumiinxe Jilaxxa Faaro

Faarsaaleeyyetike Sooresi’a Tsigerediinke Meellinni Qorexxe hortexxa Gence, Jaalalatixxa Faaro

1 Eloxxe yaane anke godoba’ni wo’mite’e dhangalaate;

fulcheennexxa faaronna moyanjokee laqisanno;

arabi ankinna beeka borressanjiinxe tiikkoshshaten.

2 Ati manjiinke belto duuchchanaa’n danchummati quba saxxeeteken;

haaso’i atikinna gaachchanna afe’eeke;

tennee atee Mageni duuchchi woddi’a eebbise’een.

3 Ulfaatettekenna gaachchanna afe’eeteke

goottaa,

wolaatichcha atika ka’li.

4 Gaachchanna oddo’wite’e injifachchotee’e ke’i;

dhugatixxee’e, shaqquntetixxeenna qullumatixxee

atixxi middixxi anga mambe’iinxa yaane assitowwaal.

5 Atik qarsemeek mogiduwwi moyanjiinke naaphika godoba otowwaal;

gosa gosak arda lekka atixxi hunda ibowwaal.

6 Ee, Magenoo! Moote atixxi, duuchchi woddi’a hexxaan;

atixxe mootummaxxi bokkonna dhugaatixxe bokkon.

7 Ati qullumma eetteten, fuggo gibbete;

tennee Mageni, atik Mageni

gammashotixxe zayitenni atee hariireexxi

ati atixxa hari’aa caaldatoshsha asse.✝45:7 Ibr. 1:8-9.

8 Atixxi seemma duuchcha’n karbe, irreete, dakkadha giissendeexxe shito fiffixxende’een;

daana’iinxe issonni giisseme’e ijaaremeeke mootummatike mine’ni begeniink, masinqotike meelii atee gammachchiisaan.

9 Moyanjiinke mootummatike mini giddo hexxeexxe mellaalle giddo moyanjuwwiink dubari hedheen,

moottitetinna Ofiirixxe worqenni seeffateexxi midda atike’ni uurrite’een.

10 Tee beltoo!

Caqasi, qalbeefati; mansha atixxanna kaba’aa wirri assi;

arda atikanna atike annika mine dedhi.

11 Danchumma atixxi moyanjo boojite’een;

isi atike gootta kadeemmaxxee’e

iso’o ulfeessi.

12 Xiroosike qachchik ardi uwwa iyyedagaan;

dureeyyetinna atenaa’n elle alfatee’e atibaa shiqate’e hassaan.

13 Moyanjiinxi belto ifi seeffateexxi moyetike mine’n ifixxe kuta giddo hexxeen;

seemma isexxinna worqeti shimalixxen.

14 Seesende gandeexxa seemma oddo’wite’naa’a moyanjiba’a iyyemmarraan;

jaaluwwa isexxe kadeek dubaruwwi isexxa duuka atibaa dagaan.

15 Insa’nenna gammashshotinna illilleetteti

moyanjiinke moyetike miniba’a e’yinaan.

16 Edike atike annuwwixxe bakka’n labbaxxi atixxi oose bakka abixxitaan;

atinna insa’nee’e boga duuchcha galchinaashsha assittatton.

17 Summi atik ilatenaa’n ilati qico’n qaabbatemaashsha assannon;

tennexxee gosa gosa ardi duuchchi woddi’aa atee saadaan.