1 Ee Duuchchi Woddike Goottaa, soodachcho anxa laqi;

oodhishsha anxanna caqasse'e anee gargaar!

2 Rakko ane'ni geltaaxxa yanna dudduro ane'ni wirri hitoxxe'e;

soodachcho anxanna laqi; ye'edhanno wodda rakketexxi heeyyi.

3 Anxe hedhoki bari wiliilletishsha sa'e muda'nee'n;

bisi ankinna boosixxe giirashsha holateen.

4 Bagoxxe badda'ashsha butute bullo'enne;

Itatanna anee boshshe.

5 Hafuura gikki asse'e aadatenaa'n kexxeexxa,

maali mudee'naa miccoke kade gatenne.

6 Qofinni qiilla gamoojje giddo hexxammaxxe ci'ashshanna

ona mine'ni hexxammaxxe urungo kadennen.

7 Diiphi ille anxe'ni haranga wileba'a;

anke minixxe guutto hana hexxammaxxe qofi galeete ciichchoshsha kadennen.

8 Hashsha barra naaphi anki afo'o ane'ni fulchedhe;

wele manna yowwateenna anka summa la'oofante.

9 Bululii ani'a itate kade;

ha'wannochcho'n indiddo anixxinna coccobbe.

10 Tinninna kaddeechchi ati anee qophphi assite kexxe'e

mufeti takki asssitetaxxeeten.

11 Bari ank haru'mita'n me'itammaxxe galgalixxe gaaddiddoshshaten;

aninna badda'atishsha qoorannon.

12 Ee Duuchchi Woddike Goottaa!

Ati kinni duuchchi woddi'a moota'n hexxattoken;

gurri atikinna ilatenaa'ni ilati qico'n quba sa'a'n me'aan.

13 Tsiyooni'a godoba shaqqitattoxxi yanna shiqqemmaxxeenna

iitti yanna ta'ate kaddeemmaxxee

ati kexxetexxi ise'anna marartatton.

14 Atika erganjuwwaara isexxi kino eeyyisaan;

diigendeexxe isexxe ole'anna midde marrarraan.

15 Gosa gosak ardi Duuchchi Woddike Goottika summa,

buttatiki moyanjuwwi duchchinna isixxa hunna sodaataan.

16 Duuchchi Woddik Gootti Tsiyooni haaroba ijaaraaxxa yanna

ifike luminninni ardake'n leellaan.

17 Rakkiyyetixxa soodachcho laqa laqaan;

kadha insa'neexxanna tuffatabaani.

18 Edi'a ilemmaaki manninna Duuchchi Woddika Gootta galateeffataashsha,

isi asseexxa tennee mambe'a yanne daggaaxxe ila'a borreesse

19 Duuchchi Woddik Gootti ifixxe iimixxe woyyitte bakka'ni hedheexxi

iimi'ni butti'a uude.

20 Tenneenna asseechchi usuremeemmake mannixxa oodhishsha laqeexxi

reyo itti murendeemmakaaranna wocci assaashshaten.

21 Tennexxee Tsiyooni giddo Duuchchi Woddike Goottik summi saademaan;

Iyyerusaalemi giddonna galateefatemaan.

22 Tinninna kadaaki gosa gosaki arduwwinna mootummuwwa

mitteba bukki hiteexxi Duuchchi Woddika Gootta magenoonfataa woddan.

23 Dargageesummande'ni hedhee'naa Duuchchi Woddik Gootti huna anxa enqe;*

hedho anxanna harunse.

24 «Ee anke Magenoo! Bari atik ilatenaa'ni ilate'ni sa'aake kadeemmaxxee

Baro anka muxebe'nok

anke barike gamisa'n anee adhdhittoxxe'e.

25 Ati olma butta dadeten;

immuwwatinna atixxe angaxxe hujen.

26 Iimatinna butta baxxaan; atik kinni hexxatto;

kunnichchi duuchchi seemmatishshanna mudaan;

konnechchuwwanna oddoonotishsha jijjiiritee'naa gopheemaan.

27 Ati kinni duchchi wodda atenden;

bari Atikinna haranga mudaakebaan.✝

28 Atike erganjuwwixxi oose nage'ik hexxaan;

ila ila insa'neexxinna atixxe heqqanni le'mitebaangi hexxaan.»