1 Ani osse'e Duuchchi Woddika Gootta heeqqedhenne;

isinna anbaa wirri hiyye'e oodhishsha anxanna laqe.

2 Caffa'atixxe balenaa'n,

dhoqetike salaqanaa'n anee fulche;

lekka anxanna rassati hana uurrise;

me'aa anxanna jabeese.

3 No'oke Mageni'a kaddaaxxa saadino,

haaroxxa faaro afo'o anke'n ugge;

heddi manninna isoo uude'e sodaateexxi Duuchchi Woddike Gootta'ni addataan.

4 Duuchchi Woddika Gootta addataake,

ifi dukaaka manna addatabaake,

dharichchi manniba'a higati insa'nee hordofabaake

manjixxa wodo.

5 Ee, Duuchchi Woddike Gootta anke Magenoo!

Ati no'aa assite'eettexxi mambe'aa yaanuwwa heddoten;

ati no'aa heddeetteexxaara dande'e laakko'aak ayyinna hedhebaan;

haaso'anno, kulannon hiyyeennele bira saxxaan.

6 Ati tolchakanna uwwa hassebexxo;

kinni mansha anxa bandette;

ciincatika tolcha, cubbo biratika tolchanna eetebexxo.✝

7 Tennexxee aninna, «Kunse ani dage'eennen,

anxee'e maxaafi giddo borreessende'een.

8 Ee, anke Magenoo! Fedhi atixxa muuxonna'a eeyyaannen;

seeri atikinna anke godobi giddo hedheen» hiyyenne.

9 Ani lumoxxe bukki giddo qullumma atixxa haaso'enne;

Ee, Duuchchi Woddike Goottaa, ati egendetteshshanni afo'i anki sammi hiyyabaan.

10 Qullumma atixxa anke godobi giddo sho'e walabe'non;

addateemmallumma atixxanna anjira atixxa haaso'annon;

jaalala atixxanna dhugaa atixxa lumoxxe bukki'n sho'ebe'non.

11 Ee, Duuchchi Woddike Goottaa! Mararte atixxa anenaa'n uurrisoxxe'e;

jaalala atixxinna dhugaa atixxi duuchchi wodda anee heqqittowwaal.

12 Laakko'a dhaqqassiissabaaxxi fuggo anee buqqe'een;

cubbo anxiir ane'ni daldeemmaxxee afa dande'abe'no;

anke umike ordichchi caalanna bira saxxe'een,

Godobikinna anee hophphole.

13 Ee, Duuchchi Woddike Goottaa! Anee anjirtotta'a fedhi atixxe kaddowwaal;

Ee, Duuchchi Woddike Goottaa! Rakke'e anee gargaar.

14 Lubbo anxa shiyo'a hasaak duuchchi salphatowwaal; shookowwaal;

miidhensha anxa eeyaak duuchchinna salphate'e udumi'a higowwaal.

15 Anxe iba'ni «Hashshuu! Hashshu» hiyyaakiir

ifinge umike salphinninni shookowwaal.

16 Atee halsak duuchchi kinni illillisowwaal;

ate'ninna gammadowwaal;

duuchchi wodda atixxa anjirema eeyaakiir «Duuchchi Woddik Gootti saademuun» hiyyowwaal.

17 Ani kinni hiyyeessakenna rakkichchaken;

Dada Duuchchik Gootti kinni ani'a hedaan;

ati anke gargarsanjonna anke anjirallon;

Ee, anke Magenoo! Turtoxxe'ee.