1 Haallee luya;

Tee anxe lubbo Duuchchi Woddika Gootta saadi.

2 Ani anxe hedhoke baro duuchcha'n Duuchchi Woddika Gootta saadannon;

hedhenneke baro duuchcha'ninna Mageno anka faarsannon.

3 Anjira dande'abaake galchalluwwa'ni

yookaan manjiinke belto'ni amandinoqqe'e.

4 Hafuur insa'ne giddii'ni fullaaxxa yanna,

insa'ne buttinage'ni hingaan;

eetteeneen barra yaadi insa'nek duuchchinna ba'aan.

5 Ya'iqoobik Mageni isike gargaarsa kade'eeke

Duuchchi Woddika Gootta ifike Mageno'ni addataake manjixa wodo.

6 Duuchchi Woddik Gootti iimanna butta,

abbaayyatanna ise giddo hedheechcho dadeek

xuurameessumma ifixxanna duuchchi woddi'a heqqedhaaken.✝

7 Duuchchi Woddik Gootti miiceemeekee'e muraake;

solo'weekeenna ita uwwaan;

isi usuremeeka manna tikeexxi fulchaan.

8 Duuchchi Woddik Gootti balla'uwwa baqqi assaan;

heeshshi hiyyeeka manna qokki assaan;

qulliyyetanna eeyyaan.

9 Duuchchi Woddiki Gootti annafee boga'n hedheeka manna heqqaan;

anna ama affebaaxxa oosenna aro'i reyeexxa melaalle qarqaaraan;

fuggaaleeyyetika ora kinni balleessa.

10 Duuchchi woddiki Gootti duuchchii woddi'a moyaan;

Tee, Tsiyooni atik Mageni ila ila duuchcha'ni moyaan.

Hallee luya.