1 Ee Duuchchi Woddike Goottaa!

Ane'n ke'a'neeke manna'n ati iso'n ke'i;

anee lola'neekaaranna ati isoo loli.

2 Atixxa lumoxxanna shixxoxxa wonte abixite'e

anee gargaartota'a ke'i.

3 Anee shora'neeke manna'n wolaantichcho atikanna bagedo atika qirqirsi;

lubbo anxanna, «Atik anjiralli anten» hiyyi.

4 Anee shiyo'a halsa'neek duuchchi shooke salphatowwaal;

anee miidho'a mari'ataaki duuchchinna udumi'a hige'e salphatowwaal!

5 Diidallo adhite me'itammake huurishsha kande'naa,

Duuchchi Woddike Goottik iimik erganj insa'nee shorrowwaal.

6 Duuchchi Woddike Goottik iimik erganji insa'nee shorraa wodda

ori insa'nek dukkanatenna salqaake kadowwaal.

7 Tola boddichcha ani'a fonxoro sho'ne fanneexxi,

tola boddichcha ani'a bale qonte'een.

8 Keekantebaaxxi ba'ne insa'ne'n daggowwaal;

sho'neemmaxxi fonxoronna insa'nee abiddowwaal;

qonteemmanxe bale'n inbeexxi mundowwaal.

9 Lubbo anxi Duuchchi Woddike Gootta'n gammaddaan;

isixxe anjira'ninna illillissaan.

10 Anxi hedho duuchchi atee, «Ee Duuchchi Woddike Goottaa atishsha hedheek ayyete?

Balleesa gelteeka manjo isoo balleesammakeerinaa'n,

hiyyeessakanna miicemeemmaka saamaammakeerinaa'n gatisaak

atishsha hedheek ayyete?» hite.

11 Dharik dhuga'a kulaak manni anee ku'le;

ille manshati afebenoxxa yaane anee qore.

12 Elloxxixxa bado elobaaxxa ani'a hiissineexxi

qofi galeessake anee assine.

13 Ani kinni insa'nee elagonphee wodda jooniyya seemma oddo'wenne;

agabo goddonna hosa'n ifinna heeshshi assenne;

soodachcho anxinna hiissichcho alfitebaang gatteen.

14 Anke jaali'a yookaan anke dayyi'a yaadannashsha

yaadenne;

ama ifixxee oodhammake manjishsha yaadoti umo hangulli asse'e oodhenne.

15 Insa'ne kinni ani gugguffatenne wodda gammanda'n bukki hine;

gacifalleeyye dedhange ane'n bukki hiteexxi

cita belo anee niniffe.

16 Insa'nee Mageni belo hedheeke mannishsha ane'ni qacifanite;

suumatanna ane'ni ga'me'ne.

17 Ee Duuchchi Woddike Goottaa! Haani qico'n sammi uudatto?

Lubbo anxa miidhake mannannaa'n,

hedho anxa konne neenqinaa'n gatis.

18 Tuutati giddo atee galateeffatannon;

Heddi ardi bukki hiyyeebanna atee saadannon.

19 Tolanga ani'a naaphake kadeekiir meenni ane'ni gammadowwaal

iittanni anee gibaakiirinna meenni ane'n ille weli qiphowwaal.✝

20 Afo'o insa'neekenaa'n eloki haaso'i fulabaan;

bogake'n nage'ik hedheeke manna'n sobiinxa yaane mari'antaan.

21 Haanni hine'e ane'n haasonna'n,

«Ee abboo! Ee abboo! Ille no'oxxenni assitteettexxa uundeennen» hine;

22 Ee Duuchchi Woddike Goottaa!

Ati kinni tennee uudeeten, mee sammi hiyyi.

Ee dada duuchchike Goottaa! Anenaa'n bayyattoxxe'e.

23 Anke Magenoo, anke dada duuchchike Goottaa!

Ani'a baassittotta'a ke'i! Ani'a murtotta'anna qophphi hiyyi.

24 Ee Duuchchi Woddike Gootta anke Magenoo!

Atixxe qullummashshanni ani'a mur;

meenni insa'ne'e ane'ni gammandowwaal.

25 Insa'ne godobi giddo, «Ee abboo! Hendennexxi kadde'een

isonna injiffanteennen» hinaashsha assitoxxe'e.

26 Anxe rakko'n gammadaak duuchchi

salphatowwaal; shookkowwaal;

ane'n ifi dukaak duuchchi salphateexxi shooko oddo'wowwaal.

27 Qullo fula anxa eeyaak duuchchi gammada'n illillisowwaal;

duuchchi woddanna, «Ifike Erganjixxi yaanexxa qaba eeyyaak Duuchchi Woddik Gootti lummedhuun» hiyyowwaal.

28 Ank arabi atixxa qullumma,

saadinno atixxanna barra duuchcha haaso'aan.