1 Tee anxe lubboo! Duuchchi Woddika Gootta saadi!

Ee Duuchchi Woddike Gootta anke Magenoo!

Ati hara lumoken!

gaachchannakanna ulfinna oddo'wite'eeten.

2 Ifakanna seemmuffa oddo'wite'eeten;

iimatanna duunkaaniinsha dhisse'eeten.

3 Dhisendeexxe iima'n hedheeke wodi'i iimi darre mine ifi'a ijaadhiteeten;

Duumancha ifike sarageella assexxete;

diidallotike keelinninna me'ittatton;

4 Diidaallo atixxe erganjon;

giiratik bubeninna ati'anni ergatemaan.✝

5 Butta isexxe booso'n jabeessite ofo'lishshette;

haranganna munnuqqi hitabaan.

6 Lumoxxa abaayya seemmatishsha iti oddeesitete;

wodi'ikinna koobuwwa buqe.

7 Wode'e xixxatale ati edi'ni baaje;

atixxe dindinsoka luuljonna laqeexxi hurru hiyye gonge.

8 Ati isi'a qopheesitetexxe bakkabaa

kobuwati hananna dhoquwwa giddi'a yaa'e.

9 Ileema higeexxi butta buqabaashsha,

qaxxamure sa'abaashshanna gabaldete.

10 Muumuwwa dhooquwwa giddi'a yaataashsha,

galaanuwwikinna koobuwwatixxe oddonaa'ni sa'ani me'aashsha assittete.

11 Konne qicinni biniinchi wode'e ha'wo'a qixxeessittete;

diidiinxi harrenna ha'witeexxi dhebo fuldaan.

12 Tenne muummuwwa hananna galaanuwwi qarqara hexxeexe haqquwwa hana

mine ijaadhite'e ci'a woccaan.

13 Iimi'ni koobuwwate'ni xeena wocci assittaton;

buttatinna atixxe hujexxa gumma badhaataan.

14 Horekee'e anso lattissatto;

hiddichchuwwikinna manjokee'e la'o uwwashsha assittato;

konne qicinni manji itatee kadaachcho wiisse aassedha.

15 Tennexxee isoo gammachchiisaaxxa woyinetixxa booka

alba cululussitaaxxa zayitenna

hunna lebbaaxxa ita qophpheesedhaan.

16 Duuchchi Woddik Goottik haqichchuwwi

isi kaaseeki Libaanoosik birbirsuwwi geyaaka xeena alfaan.

17 Ookkone haqichchuwwi hana ci'a mine ijaadhitaan;

huummuwwatinna eettene haqquwwa hana galdaba gissexxaan.

18 Gadansuwwi lumolla koobuwwa'ni afemaan.

Ossoluwwatinna kinotike holli giddo hexxaan.

19 Baate mitte mitte agenjike ke'iti'a beessisake kaddaashsha daddete;

arishshonna aaggaxxa yanna egendaashsha assittete.

20 Dukkana daddette; bogikinna hashsha;

dukkana giddo biniinchi duchchi badda'atenaa'ni yaa'a.

21 Mageni qophpheesseexxa ita addaandaa wodda

neniqiinxi beltana ittanda.

22 Arishsho fuldaa wodda

illeema higge'e me'iteexxi galdammaba diiphpha.

23 Ookkoneechchi uduma manji hujete'ni bobba'a;

hashshaa qico'ninna hucca'n hosa.

24 Ee Duuchchi Woddike Goottaa!

Ati heddochcho daddeeten;

duuchchingechcho beekkuma atikenni daddeeten;

atixxi dada buttate'n wo'maten.

25 Laakkossi dandeesisabaaxxi lumollammanna shiixxarramma lubboxxi dada

giddo hexxa'neexxe tenne ba'laxxenna lumoxxe abbaayya

26 hana markabuwwi me'aan;

ati daddetek lewataan hiyyemaak

lumok naachchinna isen giddo geebaan.✝

27 Kunnichchuwwi duuchchi hasaaxxe yanna'n

itaachcho isi'a qophpheessittota'a addata'neek atenden.

28 Ita konneechchuwwi'a uuttato wodda kunnichchuwwi itaan;

atixxa anganna qeersatto wodda

kunnichchuwwi elolla yaane ite goddaan.

29 Dudduro konnechchuwwa'n wirri hittato wodda duuchchiingechchi alayyaan;

uuteetaka hafuuranna konneechchuwwinaa'n adhdhittato woddanna reyeexi

dademeemmange buttina'n higaan.

30 Hafuura atika hiisite'e uuttato wodda kinni

kunnichchuwwi dademaan;

buttatinna haaroxxa hedho hexxaashsha assittato.

31 Duuchchi Woddike Goottik gaachchanni duuchchi wodi'a hedhowwaal!

Duuchchi Woddik Gootti dadeexxe dada duuchcha'ni gammadowwaal.

32 Isi butta uudaa wodda lele'mitaan;

koobuwwatanna kisaa wodda wiliildaan.

33 Anke baro duuchcha'n Duuchchi Woddike Gotta faarsaannon;

hedhoti hedhenne qico'n

Mageno anka galatik saadannon.

34 Gammashsho ani'a uwweek isote kademmaxxee'e

yaadi ankinna isoo gammachchiisowwaal.

35 Cubbaleeyye buttatenaa'n baxxowwaal;

fuggoxxa hujaakiirinna kutti hiyyowwaal.

Tee anxe lubboo! Duuchchi Woddika Gootta saadi!

Tee anxe lubboo! Duuchchi Woddika Gootta saadi!