Daawwitixxa Faaro.

1 Duuchchi Woddik Gootti moyedheen; ardi culiphisuun; kuruubeeli hiyyendaaxxe daaduwwa hana hexxeexxe ifixxe moote'n ofo'le'een; butta le'mituun.✝

2 Duuchchi Woddik Gootti Tsiyooni'n lumoken; gosa gosake arda duuchcha'ninna xungote'ni hedheeken.

3 Lumedhe'eekanna gaachchanna afeeka atika summa saandowwaal; qullichchi isoten.

4 Dhugaa eetattokee lumoke moyanjoo! Ati seera uggite'eeten; dhugaatanna qullumma Isira'eeli giddo hujje'eeten.

5 Duuchchi Woddika Gootta no'oka Mageno saadde! Mootte isixxi hundanna isi'a kumbu hiyye; isi woyyichchaken.

6 Muusenna Aarooni isixxe qeessemman; Saamu'eelinna isoo'o soodateemmake mannanaa'ni mittekemman; insa'nenna Duuchchi Woddika Gootta ye'ne; isinna hiissichcho insa'ne'a uwwe.

7 Duumanchiink utuphi giddo hedheexxi insa'ne'n haaso'e; insa'nenna uggemmaka seeranna uwwemmaka ajaja muunxe.✝

8 Ee, Duuchchi Woddike Gootta no'oke Magenoo! Ati soodachcho insa'neexxa laqqette; insa'ne'anna araarendeteke Magenon; Yaane kinni assinemmaxxe balleessaxxee insa'nee mura woxisa waldebexxo.

9 Duuchchi Woddik Gootti no'ok Mageni woyyichchake kadeemmaxxee

isoo saadde;

woyyitte isixxi kooba hananna isi'a sagadde.