1 Ee, Magenoo! Moyanji toggitte atixxa murte muraashsha,

atixxa qullumnna iso'n barachchiis.

2 Konne qicinni arda atika qulummati,

hiyyeeyye atixxanna dhugati galchaan.

3 Koobuwwa nage'a,

tullichchuwwikinna qullumma uwwaan.

4 Moyanji miicemeeke ardi'a dhugaati muraan;

rakkiyyetixxa oosenna anjiraan;

miicammaakaaranna bulleessaan.

5 Isi, arishshonna agenji hedheeke baro duuchcha'n

ila ila'n moyowwaal.

6 Isi worqemeeke fichcha'n ganammake xeenishsha,

kiiffammaxxe kiifoshshanna butta shanshaan.

7 Isike baro'n qulliyye daraartaan;

agenji hedheeke baro duuchcha'n nage'i bira sa'aan.

8 Isi, arsho fuldammabaa'n aaggamma qico'n,

Efiraaxisike galaananaa'ni buttatixxe gabala qico'n galchowwaal.✝

9 Qiilla gammoojje giddo hedhaaki ardi isi edo sagadaan;

naaphi isikinna buttina arraaphphaan.

10 Teriseesikinna giddichchuwwiink moyanjuwwi

irbo isi'a uuwwaan;

Sheebakinna Saabak moyanjuwwi uwwa isi'a iyyedangaan.

11 Moyanjuwwi duuchchi isi'a heeshshi qokki hiyyaan;

gosa gosak arduwwi duuchchi isi'a ergatemaan.

12 Isiba'a raartaaxxa hiyyeeyye,

rakiyyetanna gargaaraka afebaaka manna anjiraan.

13 Hunna afebaakeenna hiyyeeyye manni'a mararaan;

rakkote'n hedheeka mannanna reyotenaa'n gatisaan.

14 Munde insa'nexxi isi edo hira afe'eexxe kaddeemmaxxee

isi miicammakenaa'ninna xaqarammakenaa'n insa'nee gatisaan.

15 Moyanji qeeraka baro hedho'o;

Sheebaki manninna worqe isi'a iyyedago'o;

ardikinna duuchchi wodda isi'a soodato'o,

duuchchi wodda iso'o eebbiso'o.

16 Bogi duuchchi midhati midhate kado'o;

koobuwwa duuchcha'n midha fuldo'o;

Libaanoosixxe koobuwwaxxe midhashsha misso'o;

qachchuwwiink ardinna badda'atishsha bira sa'o.

17 Summi isiki duuchchi woddi'a hedhowwaal;

arishsho hexxeeke baro duuchcha'n gurri isikinna fulo'o;

gosa gosaki ardi isixxee eebbisemo'o;

insa'nenna isoo «Eebbiseme'eeken» hinaan.

18 Isin calli mambe'a yaane assaak,

Duuchchi Woddiki Gootti Mageni,

Isira'eelik Mageni saademowwaal!

19 Ulfaate'eeki isik summi duuchchi woddi'a saademowwaal! Ulfinni isikinna

butta duuchcha'n wo'mowwaal!

Hamiini! Hamiini!

20 Isseyike beltixxi Daawwitixxi soodachcho kaba muuxxende.