1 Anxe lubboo! Duuchchi Woddika Gootta galateefat!

anxi giddixxi hedho duuchchanna isika woyyichcha summa galateefat;

2 Anxe lubboo, Duuchchi Woddika Gootta galateefat;

isixxa arijummanna deetoxxe'e;

3 Cubbo atixxa duuchcha gattowwaal hiyyaak,

ela gonphe atixxanna fayyisaak,

4 reyotenaa'n atee gatisaak,

atee eeyyatinna ati'a arijoomat eloxxa yaane ati'a assaak,

5 atixxi ka'imummanna sinbiriinsha muuxxato'a

halcha atixxa elollamma yaannenni goddisaak isoten.

6 Duuchchi Woddik Gootti assaaxxe duuchcha'n qullichchaken;

miicemeeke mani'a dhugaate muraan.

7 Assaaxxa duuchcha Muuse'ni kule;

Asseexxa mambe'iinxa yaanuwwanna Isira'eelik ardi uudaashsha asse.

8 Duuchchi Woddik Gootti ba'lakenna gattowwaaliken;

mufe dande'aake, jaalalatinna bira saxxe'eeken.✝

9 Isi duuchchi wodda manjo xixa'n hedhabaan;

mufateeshshanna duuchchi woddi'a gatabaan;

10 Hunjennexxe cubboxxe qixxe'ni no'o'ni mureba'an;

no'oxxe balleessashshanna halo no'o'ni fuleba'an.

11 Iima buttatenaa'ni bayyataa qici lumoke kademmashshanni,

iittanni Mageni isoo magenoofataakaara eeyya qici lumoken.

12 Arisho fuldammabi aggammabaa'ni bayyatamma qicishsha,

Mageni noxxa cubbo eettene qixxe'n no'onaa'ni bayyise.

13 Oose ifixxee anni godoba ba'latamma qicishsha

Duuchchi Woddik Goottinna isoo magnoofataakeeri'a ba'lataan.

14 Duuchchi Woddik Gootti no'oo maayenaa'ni daddemmennexxa ege'nedheen;

no'oxxi buttinake kadanna iso'n barraten.

15 Manjiinxi hedhoqa bada'atishshate;

nophpheexxi daraarammake badda'atike daraarishshate;

16 Iikki daraari diddallo iso'n gandaa wodda iikki woddi ba'aan;

hedhemmaxxi bakka midde ege'nendaba'a.

17 Duuchchi Woddike Goottixxi jaalala kinni

duuchchi woddinaa'n duuchchii woddi'a isoo Magenoofataakeera'niten;

qullumma sixxinna insa'nexxe oosexxe oose'n hexxaan;

18 Tenneenna assaak

isixxa kako heqqedhaakeera'ninna

isika ajaajanna muuxo'a xonxoommataakeera'niten.

19 Duuchchi Woddik Gootti ifixxa moote iimate'n qophpheese'een;

mootumma isixxinna duuchchiinge'niten.

20 Ha'noo isike hiyyichchi'a ajajendina'neexxi, isi hiyyaaxxanna laqqina'neexxi,

ha'noo hunnaameeyye erganna

Duuchchi Woddika Gootta saadde.

21 Ha'noo fedhii isixxa muuxina'neeki

isik iimik sannachchuwwi duuchchi, Duuchchi Woddika Gootta saadde.

22 Ha'no isixxe galcha giddo hexxineexxi isixxi dada duuchcha

Duuchchi Woddika Gootta saadde.

Tee anxe lubboo! Duuchchi Woddika Gootta saadi.