1 Ee, Duuchchi Woddike Gootta anke anjirallo Magenoo!

Hashsha barra ati edo oodhaannen.

2 Kadha anxi ati edo geltowwaal;

mansha atixxanna anxe oodhishshabaa wirri assi.

3 Lubbo anxi lumo qico rakkatemmaxxee'e,

hedho anxinna hundike hirreesiba'a shiqqe'een.

4 Reyeexxi moogeemammake mannishsha uudemenne;

uduuda afebaake manjonna kadenne.

5 Reyemmake manni giddo hunemeemmake,

shiyemeexxi bale giddo diriisemeemmake,

ati isoo hige'e qaabbatabexxokenna

heqqo atixenaa'n kutemeexxi gateeke manna kadenne.

6 Ati anee hirreesii hundike wiidda'n

dimma dukkaanaxxe dhi'mo bale giddo dhidhinsittette.

7 Atixxi mufe ane'n hirrik hitee a'urte'een;

danbala'i atik duuchchinna anee buqe'een.

8 Fir ank duuchchi ane'naa'n bayyatashsha,

aninna insa'nee gibisannoke assite;

hula ani'a cufende'een dande'e fulabe'non.

9 Yaadotenaa'n kexxeexxa ille anxi gophphe;

Ee Duuchchi Woddike Goottaa! Barra barra'n atee ye'edha'eennen;

sooddachotinna anga anxa atibaa ke'isa'eennen.

10 Reyeeke manni'a mambe'a assittatota?

Ekedha kexxee atee saaddaata?

11 Jaalala atixxi hirreesi giddo

xuurameessumma atixxinna ba'netixxe bakka'n kulendaata?

12 Atike mambe'ixx huje dukkanatixxe bakka'n

qullumma atixxinna dedhematike boga'n ege'nendaata?

13 Ee Duuchchi Woddike Goottaa! Anee gargaartota'a atibaa oodha'eennen;

gorsa gorsa'ninni atee soodatannon.

14 Ee Duuchchi Woddike Goottaa! Mayee anee waaldete?

Meyeeta anenaa'ni alba sho'exxete?

15 Ani oosummandenaa'n rakkichchakenna reyo shiqeennakeman;

bararaassa atixxi anee dhibbe; kadannoxxanna gophenne.

16 Mufe atixxi ane'n gelte'e

atixxi bararassa anee balleessitaan.

17 Mufe atixxinna bararassa atixxi lola'uffa anee buqqe;

duuchchi darree'n mitteba ane'n qoqobbe.

18 Jaaluwwi ankinna firi ank anenaa'n bayyataashsha assittette;

dukana calli anke jaalo kadde gatte.