1 Hallee luya;

Duuchchi Woddika Gootta iimatenaa'ni saadde;

ale iimuwati giddo isoo saadde.

2 Erganna isixxi duuchchi,

iima hexxineek isik lollalluwwi isoo saadde.

3 Arishshotinna agenji

ha'noo ifisinaaxxi urjuwwa duuchcha isoo saadde.

4 Ha'noo alixxi iimuwwanna

dhiseendeexxe iimmuwwa giddo hexxineek wodde'uwwi

isoo saadde.

5 Isi ajajee'naa'a dademmeemmaxxee'e

kunni duuchchiingechchi, Duuchchi Woddike Goottika summa saadowwaal.

6 Isi konneechchuwwa jabeesseexxi duuchchii woddi'a bakka bakka'n ofo'lshe'e

duuchchii woddi'a sa'abaaka seera uwwe.

7 Ha'noo abbaayya lumoxxe giddixxi lumolla daduwwanna

dhi'moo wodi'uwwi duuchchi

Duuchchi Woddika Gootta buttatenaa'ni saadde.

8 Balaqikinna kaade, qorrikinna duumanchuwwi,

ajaja isika muuxxattoxxi hobonbalte,

9 koobuwwatinna tullichchiwwi,

gummatik haqichchuwwinna birbrsuwwi duuchchi,

10 bada'atik biniinchinna hori duuchchi,

godobiki me'aachchi shiixxarammichchuwwinna keelik kexxaaxxi ci'a,

11 buttatiki moyanjuwwinna gosa gosak ardi duuchchi,

jalqaabuwwikinna buttatik galchaluwwi duuchchi,

12 Dargageeyyetinna dubarri,

geedhetinna oose Duchchi Woddika Gootta saadde.

13 Summi isik calli lummedhe'e quba sa'eeke kadeemmaxxeenna

gaachchanni isiki buttate'ninna iimati hana hedheemmaxxee'e

kunnichchiwwi duuchchi, Duuchchi Woddike Goottika summa saadowwaal.

14 Isi arda ifikee'e jabeenna uwwe;

arda isike duuchchi,

isik shiqik Isira'eeli ardi,

Duuchchi Woddika Gootta saadowwaal.

Hallee luya.