1 Ca'ite qalbe afeeke Isira'eelike ardi'a Mageni eloken.

2 Ani lekka anxi guggufatte

salaqqeenaa ibe gatteene.

3 Tinninna kaddeechchi hollaammeeyyenna fuggaleeyye duroonda'naa'a uuddennexxi

insa'nee gaabbennexxeeten.

4 Insa'ne mittelcho elagonphee afa gonpheemmaxxee

bisi insa'neek fayyakenna cululuqaaken.

5 Insa'ne wele mannishsha rakkantabaan;

wele manna'ni geyaaki abari insa'nee afabaan.

6 Insa'nee holla seesinsha goobake'n uggudhine'een;

hunnati manjoke'n ke'anna seemmuffa odd'wine'een.

7 Coomi ille insa'nexxa gadhi'a xarqise;

fuggo godoba insa'neke'ni wo'miteexxi dhangalaate.

8 Insa'nee wele manna'n gaciffanta'n fuggoxxa haasonnaan;

ifi saanda'n manna miincaan.

9 Iimike Mageno'n afo'o fulche'naan;

haaso'ikinna butta duuchcha laanbunbaan.

10 Tennexxee Mageniinki manni midde gattebaang insa'neba'a wirri hiyyaan;

insa'ne hinaaxxa duuchchanna adhdhaan.

11 Insa'nenna, «Dhugaa dhugaatinxa Mageni ege'naa? Dada Duuchchik Duuchchi Woddiki Gootti Magenita ege'na afe'ee?» hinaan.

12 Iitta hexxeen yoona fuggaaleeyye duuchchi wodda shalo galda'n karra karrade'ni lephphitaan.

13 Ani qalbe ca'a assedhe'e ifi heqqedhatinna fuggoxxa assa waalat maa la'o alfenne?

14 Barra barra'ninni abara uudennen; gorsa gorsa'ninni mura woxenne.

15 Insa'ne haasonna'neeshsha haaso'eennele arda atike'n silaan xuurameesake kadanabaan.

16 Tennee yaane wo'monna'a hedenne; yaane kinni lumo qico a'urttaxxe ane'n kadde.

17 Dunkaan giddo e'yennexxi fuggaaleeyyete'n dagaachcho afano qico'n lumoshsha rakkatenne.

18 Dhugaaten, ati insa'nee salaqaaxxe bakka'n uggittatton;

inbe mundaashshanna assittatton.

19 Hitta kande insa'ne dedhange'ni munde!

Bararaaqikinna kutti hine.

20 Ee, Dada Duuchchik Goottaa! Ati kexxatto wodda

oojonteemmaxxi oojjo gorsa dedhendaammashsha insa'ne ati edii'n gophphemaan.

21 Hedho ane'n qaraartee wodda

yaadikinna ganemenne wodda

22 ani gowwa, mittelcho ege'nebaake

horiinsha ati edo kadenne.

23 Kaddo malee'e duuchchi wodda ani atinni welti hedhennen;

atinna anxa middixxa anga abidatton.

24 Gorsa atikenni anee akeekkatton;

ookkone uduma atike ulfinnibaa anee adhdhittatton.

25 Iimate'ni atee male'e ayyete afenne?

Buttate'ninna atee malee weli halsannoki hedhebaan.

26 Maali ankinna yaadi anki gopha'nee me'aan;

Mageni kinni duuchchi woddi'a anxe hunnanna anke qoobbon.

27 Atenaa'n bayyataakiir ba'aan;

ate waalaka duuchcha birtatton.

28 Ani'a kinni Mageniibaa shiqa eloxxen;

atixxa huje duuchcha lassannoshsha,

ani atee Dada Duuchchika Goottaa gollake assedhe'eenne.