1 Uduuda no'oke kadeeke Mageni'aa gammashshoti faarse;

Ya'iqoobike Mageni'aa illillissee!

2 Faarsate'n ke'we;

okolekanna ganne;

begenikinna masinqoti eloka meella meelle.

3 Baate fuldee goobandaa wodda,

no'oke ayyaanixxe barra'n malagata ufuuffe.✝

4 Kunni Isira'eeli'aa uwwemeeke seeraa,

Ya'iqoobik Mageni uwweeke ajajan.

5 Gibtseeke boganaa'n fulee wodda

kunni Yooseefike ardi'aa uwweeke ajajan.

Ege'nebe'nok laagadinni hiyye haaso'a'naa laqene.

6 Isinna hiyyee qici «Ani ha'noke dudduronaa'n ba'oo hoyyenne;

anga ha'nooxxanna qiricco abixxatenaa'n gatisenne.

7 Rakkoti wodda anee ye'exxeten;

aninna atee fulchennen;

golla diddinsotixxe bakkabaa'n hiissichcho ati'a uwwene;

Meribaake wodi'i bira hega atee uudenen.✝

8 «Anke ardaa! Atee xexxe'achchiisannen laqi;

tee Isira'eeli! Hiyya'ennexxa laqaa'eetele siilan hitta eloxxemma.

9 Weliink mageni ati giddo hedhoqqe'e;

alagiinke mageni'a heeshshi qokki hitoxxe'e.

10 Gibtseeke boganaa'n atee fulchennek,

ani Duuchchi Woddike Gootta atike Magenon;

anee laqedhi, haasisaachcho duuchcha ati'a uwwannon.✝

11 «Ardi anki kinni hiyyennexxa laqebaan;

Isira'eeli ani'a ifi uwwa gibbeen.

12 Tennexxee insa'ne ifi gallaashsha

ille mashsha duunde me'ino'aa wocci asssenne.

13 «Ardi anki hiyyennexxa laqe'eele,

Isira'eeli silaan ora anke'n me'ite'eele,

14 Ani naapha insa'neeka silaan injifate'eennan;

anga anxenni diina insa'neeka silaan gane'eennan.

15 Duuchchi Woddika Gootta jibbaak duuchchi isi edo wabbi hiyyaan;

insa'nenna duuchchi woddi'a mura wonxa'ni he'naan.

16 Ha'noo kinni eloxxe dinne ittisannon;

rassati giddike malebbininna ha'noo goddisannon.»