Faarsaleeyeetike Akeekisanji'a Saadinoti woddixxa Daawwitixxa Faaro.

1 Ee, Duuchchi Woddike Goottaa! Atee'e golla anke assedhe'eennen

anee shookkishshoxxe'e;

qullumma atixxenni anee anjir.

2 Mansha atixxa aniba'a wirri assite'e laqi;

rakke anee anjir;

golledhannoxxe anxe rassa,

anjiremonna'aanna anxe kollo kad.

3 Ati rassa anxenna golla anke kaddettaxxee

summa atingee hite'e anee akeek;

orakanna ane'n leellishshi.

4 Ati anke golla kaddeettaxxee'e

naaphi ani'a faayeexxe fonxoronaa'n anee'e fulchi.

5 Ee, Duuchchi Woddike Gootta dhugaatike Magenoo!

Ati anee wodde'eten; hedho anxa ate'n uwwa'enne.✝

6 Woyi fuldabaaxxa fakkuwwa magenoonfatakaara jibbenne;

yaane kinni ani Duuchchi Woddika Gootta addatenne.

7 Rakkate'naa anee'e uuddetexxeenna

anxe lubboka abara egende'eetaxxee

jaalala atixxe'n gammadee'e illillisaannen.

8 Naaphake'n anee'e sa'isite uutebexxon;

yanne kinni lekka anxa ba'laba uurrise'eeten.

9 Ee, Duuchchi Woddike Goottaa rakko giddo hedhenneni ani'a marar;

rakkotenaa'n kexxeexxa ille anxi gophphe;

lubbo anxinna bis anki wexeqeme.

10 Lubbo anxi abarik,

bari anikinna fooxxiyyat mude;

rakkotenaa'n kexxeexxa hunna gophenne;

micci anki duuchchinna wode'eke kade.

11 Naaphi anki duuchchi ane'ni gacifate'e;

ola'i ankinna caala ane'n gacifate,

anee ege'neekee'e shookkiinke kadeennen;

orake'n afemenneki duuchchinna anee baaje.

12 Reyeeke manjishsha dedhemenne;

rerteexxe oddolchoshshanna uudemenne.

13 Heddi manni hashaashaa'naa laqaannaxxee

qarqara anke duuchchi'n soda'ate hexxemman;

ani'a weli gene'e mari'ante;

hedho anxa balleessino'a mallaan.

14 Yaane kinni Ee, Duuchchi Woddike Goottaa! Ani atete addateenen

«Ati anke Magenon» hiyyannon.

15 Bari ank duuchchi hedheek anga atixxe'nten;

anke naaphixxe anganaa'ninna

shorramake mannixxe anganaa'n anee gatisi.

16 Anee erganjo atikee alba ifi,

jaalala atixxenninna anee anjir.

17 Ee, Duuchchi Woddike Goottaa!

Ani atee'e ye'eedhannaxxee, anee shookkishshoxxe'e;

fuggaaleeyye kinni shookkowwaal;

hireessa hundike'n saxxe'e buccuqqinna hitoqqe'e.

18 Qulliyyete'n hollati

ifi dukatinna tuffeti

haaso'aammak dharichchi afo'uwwi duudowwaal.

19 Manjiinke belti edo,

atee sodaatakeeri'a uggite'eetexxi,

atee gollake assedhakeeri'anna qophpheesite'eetexxi,

elle atixxi hittata bira saxxeexxe!

20 Fuggoxxa malaake mannanaa'n insa'nee atike galdumi giddo heqqittatto;

eloobake afo'onaa'ninna duunkaana atiki giddo insa'nee gollittatton.

21 Buqemeemmake qachchi giddo,

mambee'iinxe ifixxe jaalalanni anee eeyeek,

Duuchchi Woddik Gootti saademowwaal!

22 Alayyenne wodda

«Ille atixxi edii'n fuggusemeenne» hiyyenne;

ati kinni anee gargaartota'a atiba'a raarenne wodda

kadha anxa laqqeten.

23 Ha'no qulliyye duuchcha Duuchchi Woddika Gootta eeyye;

Duuchchi Woddik Gootti addatemaaleeyye heqa heqaan,

hollameeyye kinni hara xixaan.

24 Ha'noo Duuchchi Woddike Gootta'n addatinaak duuchchi

jabatte, hara jabaatte.