1 Ee iimuwwa haaqqasite silaan dirritettele;

silaat koobuwwa ati edo culphisseele!

2 Giira ha’ishendaa wodda haasumete’n bubbammashsha

wode’ekanna danfissammashsha,

Summi atik naapha atike’n ege’nemaashsha dirri;

gosa gosaxxi mootumuwwanna ati edo sheke sheke hitaashsha assi!

3 No’o heqqinebo’noxxa sodaachchisaxxa yaane assitette wodda

ati dirritetten, koobuwwatinna ati’a culphisse.

4 Olmii’ninni

atee heqqedhaakiiri’a insa’ne dhaqqabaak

Atishsha hedheeka Mageno uuddeexxi ille

laqqexxi manshanna haranga hexxemabaan.✝64:4 1 Qor. 2:9.

5 Gammashshoti eloxxa yaane assakeeri’a

atike ora’ninna hedhaakara gargaartatto;

No’o kinni insa’ne’n lenbe lenbe cubbo hunjennexxe

kunnise ati no’o’ni mufattetten;

hittata anjirema dandeennanno?

6 No’o duuchchiing batto’eke manjishsha kandeenne;

no’oxxe qullummaxxi hujenna xurik battotteexxe seemmashshaten;

Duuchchiing no’o shafiinsha harcane’en;

cubbo no’oxxinna no’o diiddallotishsha filite’een.

7 Ayyinna soodachchoti summa atika ye’ebaan;

ateenna abixxatee yora’neek hedhebaan;

Ati alba atika no’onaa’n sho’exxetten;

no’oxxe cubboxxe no’o waalde’eten.

8 Tinni kaddenaa’n Duuchchi Woddike Gootta! Ati Anna no’oken;

no’o faarake kandanno wodda ati faariinke hujallon;

no’o duuchchiingi atixxe angaxxe hujen.

9 Ee, Duuchchi Woddike Gootta hara lumooshsha no’o’n aartoxxe;

cubbo no’oxxanna duuchchi woddi’a qallitoxxe;

Maganneten atee soodantaa’enen, alba atika no’obaa wirri assi;

no’o duuchchiingi atike ardani.

10 Atik woyyichchi qachchuwwi qiilla gammoojje kade’en;

Tsiyooni midde qiilla gammoojje, Iyyerusaaleminna onake kadde’een.

11 No’oki anuwwi atee itti galateeffantemmak woyyichchikinna ulfaateemmak no’ok galmi

giirati gubate’een;

eeyyisammak no’ok boonchuwwi duuchchi bakka ba’edheen.

12 Ee, Duuchchi Woddike Gootta tinni duuchcha kaddechchi uduma higgaboxxoota?

Sammite hara lumooshsha no’o mura woxxissattota?