1 Ha'noo duuchchiing ardi tennee laqqe;

buttate'n hexxineek duuchchi tennee caqqasse.

2 Hedhokinna heenokiiri

duureeyyetinna hiyyeeyye laqqe.

3 Afo'o ankenni beekkumik haaso'annon;

anke godobi yaadinna ege'na uwwaaken.

4 Mansha anxa mammaassii darre'n wirri assannon;

begana ganatinna hiibbo anxa tikannon.

5 Fuggoxxi barra ane'ni geltaa baro

sobaaleeyetixxi fuggo anee buqqaa wodda,

mayee sodaatannotaa?

6 Karrate'n addataakaaranna

ifixxe durummaxxe birasa'ne'n ifi dukaakaara

mayee sodaatannotaa?

7 Wele manjixxa hedho woda dande'aak,

yookaan ifixxe hedhoka hira Magenokee dande'e uwwaak hedhebaan.

8 Lubbotiki hiri fiixe'eeke kadeemmaxxee

ise'a uwwemeelenna geyaak hiri haranga hedhebaan.

9 Reye moogemabaashsha

duuchchi woddi'a hedhoti hedhaashsha assatee fedheechchinna uwwemeele haranga geyabaan.

10 Beekkoletinna midde rertaaxxa ayyinna ege'neexxen;

gowwikinna hawwawwi mittenba rennaan;

ifixxa karranna welekee waalle me'inaan.

11 Insa'neeke summinni summisemeeka boga anfe'eelenna midde

insa'ne'aa hirreesi, duuchchi wodike mine insa'neke,

ilatenaa'n ilati qico'n insa'ne he'naaxxe bakkan.

12 Karra manjo reyotenaa'n gatissabaan

isi hore yookaan biniichchiinsha reyaan.

13 Kunni umo ifike'n addataake gowwoole mannikenna

insa'ne hinammaxxa addateexxi adhdhe'e insa'nee hordofamake mannike muuxamiinke qoobbon.

14 Gedhebiinsha rennaan;

reyotinna insa'nee'e gedhebiinsha allalddaan;

insa'ne ifike dancha minnenaa'n bayyanteexxi hundike hirreesi giddo aloonnaan;

qulliyye soodimaro insa'ne hirreesi hana mammarendaan.

15 Mageni ifibaa anee adhdhammaxxee

dhugaaten, isi lubbo anxa hundike hirreesixxe hunnanaa'n anee wodaan.

16 Manji dureesake kadoole,

isike minixxi karranna bira saxxa'n me'itoole sodaattoxxe'e.

17 Isi reyaa barra mittelchonna adhdhabaan;

karra isixxinna isinni welti me'itabaan.

18 Manji hedheeke barro duuchcha'n gammadoolenna

duuchchiinxi yaane isi'a qajeeldeexxee saademoolenna midde,

19 Isi edise reyemmake ifike annuwwiba'aa

langaxxa ifa hedhotika uudammabaakeerba'a me'aan.

20 Manji karra afe'e ege'na gophoole

horiinsha reyaan.