Faarsaleeyyetike Sooresi'a Daawwitixxa Galatiinxa Faaro.

1 Mageni ke'owwaal; naaphi isikinna xeeremmowwaal;

isoo gibaakinna isi edii'n baajowwaal.

2 Diidallo gandeexxi williille xeellaggammashsha

atinna insa'nee xeellagi;

gagaa giirate'n baqqammashsha fuggaaleeyyetinna iittanni Mageni edii'ni fugusendowwaal.

3 Qulliyye kinni gammadduun;

Mageni edonna illillisowwaal;

gammashshoti burraaqqowwaal.

4 Magno faarse, summa isikanna faaroti saadde;

duumanchii hana me'aaka ora giise

summi isikinna Duuchchi Woddike Goottann;

Isi edonna gammadde.* 5 Woyyitte ifixxe bakka'n hedhaak Mageni, annakanna ama affebbaaxxe oose'a annaken;

aro'i reyeexxe mellaalle'aanna dhugaati muraken.

6 Qofi hedhammakee'e horte uwwaan;

usuremeekaara tike fulcheexxi godde hedhaashsha assaan;

xaqartiyye kinni hollattaaxxe qiilla gammoojje giddo hexxaan.

7 Ee, Magenoo! Ati arda atika akeekkatta wodda,

qiilla gammoojje giddo insa'nenni welti me'ittatta wodda,

8 Siinaxxe koobake Mageni edo,

Isira'eelike Mageni edo,

Butta lele'mite;

xeenikinna iimatenaa'ni gane.✝

9 Yo'oka xeena gansiise'e bageemmaka boga hedho hiissittette. 10 Ardi atikinna ookone boga'ni ofo'le;

arjumma atixxenn hiyyeeyyetee'e hasiisaachcho duuchchanna qophpheessittette.

11 Dada Duuchchike Gootti lallabeen;

heddo melaalle odoo sa'isitte:

12 «Moyanjuwwi ifike loliinke manninni welti udu'mi'a rake baaje!

Mine gatteemmaxxi melaalle booji'o qoodende.

13 Gedhebo aalalo'a uduma gate'eemmaki manni misilluwwa keelluwwi isike birretike sibljinni buqemeexxa,

yo'oshsha calacala hitaaxxe worqenni giissendeexxe guchchuwwaxxe misilexxa guuggenna melaalle qoodendaa wodda diiphine'eeman.»

14 Dada Duuchcha ajajaak Duuchchi Wooddik Gootti moyanjuwwa xeeree wodda,

kaade Tsalimoonixxe kooba'n ibbashsha asse.

15 Basaanxi kooba yo'oshsha qeeraxxe kooban;

ise'ni heddo xunguwwanna hexxemman.

16 Tee heddo xungoxxe koobaa,

Mageni itti hedho'a fi'leemmaxxe,

Duuchchi Woddik Gootti duuchchi wodda hedhaaxxe koobaba'aa mayeete hinaaffeti uuddaattechchi?

17 Mageni heddi kumi mine'n lakko'emaake,

lummollamma ifike sarageeluwwinni welti Siinaa'n ifixxee woyyitte bakkabaa dagaan.

18 Ee, Duuchchi Woddike Goottaa Magenoo!,

ati atike alke minibaa me'ittette wodda booji'o adhdhite'e me'ittette;

xaqartiyyetinna midde gattebaang manna duuchchanaa'n uwwa adhdhittette.✝

19 Barra barra'ninni ba'o no'oxxa ba'edhaak Dada Duuchchik Gootti, Mageni anjiralli no'ok saadeemmowwaal.

20 Mageni no'ok anjiraake Magenon;

reyotenaa'ninna gantannoshsha assaake Duuchchi Woddike Gootta Magenon.

21 Mageni dhugaaten, ifike naaphika umo cancaqaan;

xaqartiyye cubbo hujjaaxxike umika qoonjonna butuchchaan.

22 Dada Duuchchik Gootti hiyyee qici, «Naapha atika Baasaninaa'ninna

abbayyaatixxe dhi'monaa'ni illee iima hiisee'e iyyeedagannon.

23 Ati munde insa'neexxa haxxa'n saxxaatton;

worshuwwi atikinna qoobbo ifika munde arraaphphaan.»

24 Ee, Magenoo, atike ulfiink me'inji leelle;

tinninna Mageni ankinna moyanji ank ifike galmibaa asse'neeke ulfiinke me'injon.

25 Faarsaleeyye edii'ni,

faarotika miya geebaakiir udumii'n,

okole ganaammak dubarri oddo insa'nexxe'n hedheman.

26 Duuchchi Woddike Goottixxe tuuta giddo isoo saadde! Isira'eelik ardi bukki hiyyeeba Duuchchi Woddika Gootta saadde!

27 Ediseexxi laakkosiki heeno'meeki Biniyaamik gosati minik ardi leelle;

ookko'n Yihudake gosati miniki akeekisanjuwwi ifike ardinni welti leelle;

udu'meexxi Zaabiloonikinna Nefitaalemike gosati mink akeekisanijuwwi leelle.

28 Ee, Magenoo! Ati hunna atixxa ajaji;

konneechchi edo no'aa assiteteshshanni atixxa hirre leellishshi.

29 Iyyerusaalemi hedheeke atike galmixxee'e

moyanjuwwi uwwa ati'a iyyedagaan.

30 Gibtseka arda, shonbooqi giddo hedheeke biniichchishsha xixi;

korometanna jabbuwwa fakkaataaka gosa gosaka arda xixi;

duuchching ati'a guluffate'e birretika ifika siblijo ati'a iyyedagaashsha assi;

bagedo ibiso'a hasa'neeka gosa gosaka ardanna xeeri.

31 Erganjuwwi Gibtsee'n dagaan;

Tophiyikinna anga ifixxa Mageniinbaa ke'issaan.

32 Buttatixxi mootummuawwa duuchchi Mageno saadde;

saadinotixxa faaro

Dada Duuchchike Gootti'a faarse.

33 Olminaa'n hexxeemmaxxe iimuwwa hana me'aaka faarse;

dindiime'e haaso'a'neekanna isoo caqasse.

34 Gaachchanni isik Isira'eeli hana,

hunna isixxinna iimate'n hedheeke Mageniinxa hunna lallabe.

35 Ee, Mageni ifixxe woyyitte bakka giddo sodaachchisa'neen;

isi arda ifike Isira'eeli'a jabeennakanna hunna uwwaan.

Mageni saademmowwaal.