1 Balleesa insa'nexxi gattowwaali hiyyendeekirxa,

cubbo insa'nexxiirinna waalendeeke

manjixxa wodo.

2 Duuchchi Woddik Gootti cubbo iso'ni laakko'abaakenna

soballo yaada afebaake manjixxa wodo.✝

3 Cubbo anxa ku'la gophenne wodda barra duuchcha fooxxi hiyyatenaa'ni kexxeexxa

micci mikit ank duuchchi gophe.

4 Hashsha barra jaba qicinni anee gandeetaxxee'e

eebbinji bonik bassaammalchishsha

hunna anenaa'n xo'o hite.

5 Cubbo anxa ate'n ege'ni'lshenne;

balleessa anxanna atee sho'ebe'no;

«Sa'ne anxanna Duuchchi Woddike Gootta'n ku'lanon» hiyyenne;

atinna cubbo anxanna gattowwaal hitteten.

6 Tennexxee mitti mitting qullichchi,

abariinxa yanna atiba'aa soodatowwaal;

jabak lola'inna dagoole isiba geyabaan.

7 Ati anke gollan;

rakkotenaa'n anee'e heqqitatton;

Naaphakenaa'n fula anxe'n gammadaake mannixxe faaronni qoqqobemannoshsha assitatton.

8 Ani atee barachchiisanon;

me'itatoke ora'inna atee akeekannon;

atee gorsannon; illetinna atee heqqanno.

9 Bixaalikinna lugaamik leenjissemmoole malee'e

atiba'a shiqammabaake,

hedduma afemmabaake

fadhachiinsha yookaan gaangeshsha kaddinoqqe'e.

10 Cubbaaleeyyetik abarii bira sa'eeken;

Duuchchi Woddika Gootta addataaka kinni,

duuchchi woddixxi jaalala iso'o qoqqobaan.

11 Ha'noo qulliyyee! Duuchchi Woddike Gootta'ni

gammadde, ilillisse;

Ca'itte qalbe afine'eekinna illillise.