1 Ee Duuchchi Woddike Goottaa! Dhugaatixxa murte ani'a murtotta'a soodataannexxa

soodachcho laqi; oodhishsha anxanna caqasi;

dharkite kaddebaak dhugaati atee soodataannexxa soodachcho laqi.

2 Ille atixxi dhugaa uuddammaxxee

murte uute'e anee qullo fulchi.

3 Hashshati towwate anee uuddetele,

mitte dedhanna anenaa'n affabexxon;

fuggoxxi anke afo'onaa'ninna fuldebaan.

4 Manjiinxe hujenaa'n, atike hiyyichchcishshanni

fuggaalleeyyetixxe me'anaa'n ifi heqedheennen.

5 Ani duuchchi wodda ati akkeekketeba'a me'eenne;

atike orinaa'n lekka anxa goshebe'no.

6 Ee Magenoo! Sooddachcho anxa laqqaattaxxee atee sooddataannen;

ani biri'a shiqqe'e

hiyyichcho anka laqi.

7 Naaphakee'e atee gollake assedheekaara

atixxe middixxe anganni anjirtattokee Magenoo!

Atixxa duuchchi woddixxa jaalala mambe'ik leellishi.

8 Illeti gummichchi heqqemaammashsha anee heqqi;

boba atixxe'ni anee sho'i.

9 Anee buqe'e lole shiyo'a hasa'neeke

godoba jabake anke naaphanaa'n anee heqqi.

10 Insa'ne maraarte anfeekebaan;

hollatinna haasonnaan.

11 Shorrine anee bunqeexxi

butta anee harkinso'a illeti anee gaande.

12 Insa'ne'e buteexxi adho'a halchamake nenqishsha,

yookaan sho'onde'e gaaddammaxxe neenqiinxe beltannashshaten.

13 Ee Duuchchi Woddike Goottaa! Daggettexxi insa'nee loli;

atike wolantichchininna fuggaaleeyyetenaa'n anee anjir.

14 Ee Duuchchi Woddike Goottaa! Insa'nexxi halcha tennee buttaxxe hedho calla

kade'eeke manninaa'n anee anjir;

Eettattoke manni'a itaachcho uwwi;

insa'nexxi oosenna geltaaxxa ita affowwaal;

insa'nexxe oosexxi oosenna gelte gattaaxxa ita affaashsha assi,

15 Ani kinni qullummati alba atika uudannon;

dammaqanno woddanna atika ulfinna uudee'e gammadannon.