1 Ee Duuchchi Woddike Goottaa! Ani ate'e shenitte qalbbenni galateffata'eennen;

hujjeteka mambe'a duuchanna haaso'aannen.

2 Ani ate'n gammada'nee, ilillisaa'enne; ee Dada Duuchchke Duuchchi Woddike Goottaa!

Atika summa faarsa'nee galateeffata'eenne.

3 Alba atika leellishshatto wodda naaphi anki udumi'a higee baajaan;

guguffatenna ibeexxi ba'aan.

4 Atixxe moote'n ofolde'e toggitte murte murtetten;

yaane anxa uude'e aneenna qullo fulchittatton.

5 Dharichcha magenuwwa magenooffatammaka arda xixxeten;

fuggaaleeyyetanna balleessittetten;

duuchchi woddi'aanna dedhdhemmaashsha assitteetten.

6 Naaphi no'oki duuchchi woddi'a ba'eedheen;

insa'neka qachchuwwanna dige'eetten;

insa'nenna haranga qaabbataaki hedhebaan.

7 Duuchchi Woddik Gootti kinni duuchchi woddi'a moyanjoke kadee hedhaan;

murte uwwo'anna qopheeffate'een.

8 Isi dhugaati butta galchaan;

toggitte murtenna ardake'e muraan.

9 Duuchchi Woddike Gootti miicemeeke mani'a dalla'aken;

rakkoti woddanna gollaken.

10 Duuchchi Woddike Gootta! Ate'e ege'neek duuchchi ate'n addataan;

atiba'a dagaaka duuchchanna waldaboxxon.

11 Tsiyooni hedheeka Mageno farse;

asseka mambe'a duuchchanna arda duuchcha'ni kulle.

12 Mageni miicemeeka manna qaabbataan;

oodhishsha insa'neexxanna dedhabaan;

insa'ne'e miicakanna xixaan.

13 Ee Duuchchi Woddike Goottaa!

Ani'a marar! Naaphi ane'ni iyyedageexxa rakko uudi!

Reyotenaa'inna anee'e gatis!

14 Tenne'e ani'a assitottole Iyyerussaalemike ardi eddo uure'e

ati ani'a hujjeteka galata mannake'n haasso'annon;

anee anjirtetexxeenna ilillissannon.

15 Gosa gosak manni ifi'a qotemmanxe bale'n ibeen;

fonxoremmanxi fonxoro insa'neenni abiddeen.

16 Duuchchi Woddiki Gootti dhugaatixxa murte muryoti ayyumma ifixxa leellishe;

fuggaleessi manni anga ifixxenni giissemmanxe fonxorro'ninni abiddemme.

17 Fuggaaleeyye reyyemak manni hedhemmaba'a me'itaan;

Mageno gibaaki duuchchinna iittanden.

18 Rakkiyye duuchchi wodda dedhendeeshsha gatabaan;

hiyyeeyyetixxi addenna duuchchi wodda tola gattabaan.

19 Ee Duuchchi Woddike Goottaa! Qophi hite ke'i,

manji ate'ni ke'o'a waldoxxe;

dharicha magenke manna'inna mur;

20 Ee Duuchchi Woddike Goottaa! Insa'ne'n soda'a ibisi,

manjoke kandeexxanna egenaashshsha assi.