Edi Sanbatiinxa Barra Faarsendaaxxa Faaro.

1 Duuchchi Woddika Gootta saada danchaten,

Ee Lumokee Magenoo summa atika faarsa eloxxen.

2 Gorsa jaalala atixxa haaso'a

xuurameessumma atixxanna hashsha lallaba danchaten.

3 Tomme jimmaateke baganinninna

masinqotike meellinni lallaba eloxxen.

4 Ee Duuchchi Woddike Goottaa, huje atixxenni anee gammachchiiseetaxxee

atixxe angaxxe hujexxee gammashshoti ati'a faaro farsa'eenne.

5 Ee Duuchchi Woddike Goottaa huje atixxi hittatta lumoxxe!

Yaadi atikinna hittatta a'ureeke!

6 Hawwawwi manni tennee ege'nebaan;

gowwa manna'ninna aaggabaan.

7 Fuggaaleeyye badda'atishsha lattoole

fuggoxxa assaakiir qufoole,

insa'ne duuchchii woddi'a ba'naan.

8 Ee Duuchchi Woddike Goottaa! Ati kinni

duuchchii woddi'a duuchiingike umon.

9 Naaphi atik Ee Duuchchi Woddike Goottaa

naaphi atik ba'a ba'aan,

fuggoxxa assak duuchchinna bittino'aan.

10 Ati anee gafarsiinsha jabeessittetten;

eloxxe zayitenninna anee lashshi assittetten.

11 Ille anxi anke diinixxa injifatema uudde;

mansha anxinna fuggichcha anke naaphixxa gadooda laqqe.

12 Qulliyye meexxetishsha barqaaqqaan;

Libaanoosike birbirsishshanna inkuruurtaan.

13 Insa'ne Duuchchi Woddike Goottike mini giddo kaaseme'een;

no'oke Magenixxe baxxe'ninna barqanqaan.

14 Cimoti giddonna midde gumminsaan;

qunfeeshanni, jabanteeshanni he'naan.

15 «Duuchchi Woddik Gootti toggitte yaane assaan;

isi anxe rassan; iso'n mitte gugurto hexxebaan» hinaan.