1 Wodi'i goonbi qico'n anee buqeemmaxxe'e

Ee, anke Magenoo anee gargaar!

2 Ani caffa'a giddo lixe'eennen;

lekka anxi uurritaaba gophphe'een;

dhi'mo woddi'iinxi giddo lixe'eennen;

wodi'i anee liqinse'een.

3 Oodhatenaa'ni kexxeexxa shaqqeennen;

quumme anxinna madootte;

anka Magenoo heqqedhaa'naanni ille anxi garjite.

4 Tolanga anee gibaaki,

anke umike ordichchi caala bira sa'eeken;

naaphi anee shiyo'a hasa'neeek,

tola boddichcha anee gibaak heddoken;

moodhebe'nolcho habaa'n aadhe hiissanno?✝

5 Ee, Magenoo! Haakito anka ati egendeeten;

balleesa anxi atenaa'n sho'ondeexxebaan.

6 Isira'eelike Magenoo!

atee addataak anxe buuto'a mee shookowwaal;

Ee, Dada Duuchcha Ajajaatoke Duuchchi Woddike Gootta Magenoo

atee harsaakiiri anxe buutonaa'ni kexxeexxa mee salphattowwaal.

7 Ani atixxee hiyyee yowwichcho osse'eennen;

shooko odo'we'eennen.

8 Anke dayyuwwixxe oddo'ni mannake,

anke godobike dayyuwwi'aanna alagake kadeennen.

9 Atike minixxi eloxxi hinaaffe giiratishsha anee gubbe;

atee yowwinaammaki yowwichchinna ane'n geye.✝

10 Soodachchotee'e agabo goddo hosa'n oodhennexxee'e,

insa'ne anee yowwine.

11 Yaadotee dooniyya seemma oddo'wenne wodda,

mammaasiinke kadenne.

12 Songote'n ofo'laak anee hamateen,

machcho'alluwwi sirba'n anee yowwaan.

13 Ee, Duuchchi Woddike Goottaa!

Ati eetteettexxe yanna'n atee soodatannon;

duuchchi woddixxe atixxe jaalalan,

atixxe dhugaatixxe anjiranni hiissichcho ani'a uwwi.

14 Dhoqqe anee liqiinsitabaashsha anjir;

naapha ankenaa'ninna anee heqqi;

dhi'motenaa'ni anee fulchi.

15 Lola'ii anee addhoqqe'e,

dhi'mo wodi'i anee liqiinsoqqe'e, balle anee ittoqqe'e.

16 Ee, Duuchchi Woddike Goottaa!

Atixxi duuchchi woddixxi jaalaala eeloxxe kadeemmaxxee hiissichcho ani'a uwwi;

lumoxxe atixxe marartenni anbaa wirri hiyyi.

17 Anee atika erganjo alba sho'exxoxxe'e;

lumoxxe rakko giddo hedhennen rakke ani'a hiissichcho uwwi.

18 Anbaa shiqqe'e anee wodi; anke naaphixxe dhiibe'aa hitee anee fulchi.

19 Hitte qico yowwemaanneexxa,

shookennexxanna salphatennexxa ati egende'eeten;

naaphi anki duuchchi atixxe ille edii'n sho'omeekebaan.

20 Yowwichchi anee miidhe,

aninna godoba kultenne;

ani'a o'waaka manjo heqqedhennen kinni ayyinna hedhemmabaan;

anee jajjabeessaa manjo heqqedhennen,

kinni mittikinna hedhemmabaan;

21 Itannolcho'n qaraaraachcho worre;

dheebo'wenne wodda majajaachcho uune.✝

22 Inda'neexxi qore insa'ne'a fonxorote kaddo'o;

indeexxi itanna insa'ne'a suruurake kaddowwaal.

23 Anfabaashsha ille insa'neexxa balleessi;

duuchchi woddanna xukkine he'naashsha assi.✝

24 Jabaaxxe mufe atixinni insa'nee gan;

bubbaaxxi atixxi mufe insa'ne'n dirritowwaal.

25 Bitum insa'neek onowwaal; dunkaana insa'neke'n mitti majinna hedhoqqeie.✝

26 Ati gandeteka manni shorraan;

ati madoositteteke mannika abarra haasonaan.

27 Balleessande'n belleessa lephphinaashsha waal;

insa'ne'aanna araarendoxxe'e.

28 Summa insa'neeka hedhotike Maxaafanaa'n balleessi;

qullichchi manninni welti borreesemmoqqe'e.✝

29 Ani kinni rakkonna abara uudeennen;

Ee, Magenoo! Anee heqqi, anee anjir.

30 Mageniinka summa faaroti saadaannen;

galatiinxe faaronninna isoo lummisannon.

31 Tinninna kormanna jibiichii caala Duuchchi Woddike Gootti'a gammachchiissaan.

32 Rakkiyye manni tenne uuda wodda gammadaan;

Mageno halsitinaakiir jabaatte.

33 Duuchchi Woddik Gootti rakkiyyetixxa soodachcho laqaa laqaan;

usuremeeka ifika ardanna waalabaan.

34 Iimatinna butta, abbaayyatinna abbaayyuwwat giddo lele'maachchi duuchchi

Mageno saadowwaal.

35 Mageni Tsiyoonii'i anjiraan;

Yihudaka qachchuwwanna qammalchaan.

Ookkoneechchi uduma ardi isikinna ookko hedhaa'ni bogakanna ifike assedhaan.

36 Isike erganjuwwixxi hortenna ookkonee boga adhitaan;

isika summa eeyyaki duuchchi ookko hedhaan.