1 Lumok Mageni, Duuchchi Woddik Gootti haaso'aan;

buttattika arda arishsho fuldammabaa'ni aaggamma qico'n ye'aan.

2 Danchummati hara quba saxxeexxe Tsiyoonixxe koobanaa'n

Mageni ifaan.

3 Mageni no'ok, daga dagaan; sammi hiyyabaan;

isi edo giira ittaaxxi hexxeen;

qarqara isike'ninna jabaxxe hobonbaltenna qoqqobe'een.

4 Isi arda ifike'ni muro'a, iima hexxeexxa iimanna butta hiyyeexxi ye'a qici,

5 «Tolchik aninni kako aageeka anka xurameessuwwa ani'a buklki asse.»

6 Umo ifingenninni Mageni muraake kadeemmaxxee'e

iimuwwa qullumma isixxa lallabaan.

7 Mageni hiyyee qici, «Koo anke ardaa! Haaso'aannen laqqe, tee Isira'eelii cubbo hujjettexxa dhugaa kulaanneni

ani Mageni atike Magenon.

8 Tolcha atikee ate'e komatabe'non

atik ciincatik tolchi duuchchi wodda ani edo hedheen.

9 Ani kinni kormaa atika dalla'i giddii'n,

atixxa re'etixxa korbeeyyenna goodhe giddii'n adhdhannokebaan.

10 Badda'atik biniichchi duuchchi

kumuwwik laakko'endaaxxe koobuwwa'n hedheek hori anken.

11 Koobuwwate'n hexxeexxa ci'a duuchcha ege'ne'eennen;

badda'a giddo lubbo afeechchi duuchchi anilchon.

12 Buttatinna buttate'n hedheechchi duuchchi anilcho kadeemmaxxee

solo'wonolenna ate'n kulabe'non.

13 Isi ani korommetike maala itannota?

Yookaan re'etixxa munde ha'wannota?»

14 Magenokee'e galatiinka tolcha shiqishi;

Galata Dada Duuchchike Duuchchi Woddike Gootti'a tolchi;

werreega atikanna hunna duuchchikee uwwi.

15 Mageni, «Rakkoti baro anee ye'edhi;

aninna atee fulchannon; atinna anee ulfeesittaton.»

16 Mageni kinni fuggichcha hiyya'nee qici:

«Anka ajaja maa haasottaate?

Anxa kako arbo atiken maa summa gandatto?

17 Ati ajaja anka jibbittatton;

hiiyyichcho ankanna ifi udumi'a hundatton.

18 Moodhalcho affato wodda welti jaalondatton

yaababulakeerninna mittondatton.

19 Afo'o atika fuggoxxe'e uuteeten;

atik arbinna sobo haaso'ee.

20 Dayyo atika ofolde hamatete;

godobike atike dayyika summanna balleessitete.

21 Tennee assiteeten; ani kinni sammi hiyyanoo?

Anee'e atende assitete?

Ta'a kinni ati assiteetexxa duuchcha ati edo farri asse'e leellishshe atee xixannon.

22 «Ha'noo Mageno deetinaak manni tennee hubatte;

kada gophphoole ani ha'noo balleessannon; ayyinna ha'noo gatisaak hedhebaan.

23 Galatiinka tolcha ani'a shiqishaak isi anee ulfeessaan;

ora ifikanna toggi assedhaaka ani Mageni isoo anjirannon.»