1 Koo ha'no galichalluwwi dhugaandinni qullummatika haaso'a haasotina'ee?

Manjiinke belti'aa dhugaati murtina'nee?

2 Waawwo'o! Ha'noo godobik dhugaate kaddebaaxxa yaane heddinaan;

bogi giddo hunnati manjoke'n kexxinaan.

3 Fuggaalleessi manni amati goddobinaa'ninni gore'eeken;

insa'nee ilemeenxenninni deene'eekenna dharaammeeyyeten.

4 Insa'nexxi ha'la dhudhdhufiinxe ha'lashshaten;

laqa gibbeexxi mansha ifixxa duuchchexxeemmaxxe buuteshsha,

5 isee'e hawwi assaake manjika haaso'a

yookaan beeka gojaalessika hafuura laqa gibateeten.

6 Ee, Magenoo! Isso insa'nexxa afo'o insa'nek giddo buttuchchi

Ee, Duuchchi Woddike Goottaa konne neenqishsha sodaachchisa'neeke mannika kallaada harcaasi.

7 Yaa'eexxi sa'amake wodi'ishsha ba'nowwaal;

gabet darbatee qopheefantaa wodda mogidi insa'ek cirmowwaal.

8 Me'itaa wodda cingita'n mudammaxxe haqanqaleshsha kandowwaal;

rerte ilendexxi ifake hiyyemaachcho uudebaaxxe anno kandowwaal.

9 Insa'ne shamoxxi yookaan bagoxxi ute giirendebaa edi darre meshetanna eebbishebaa edi darre

diidalo filte adhdhite me'itammake huurishshaten.

10 Qulliyye Mageni insa'ne'aa halo fulaa'naa'a uuddaa wodda

gammaddaan;

lekka ifixxanna dabaalleyyetixxe mundenni anshexxaan.

11 Ookkone wodda manni,

«Dhugaaten, qulliyye hira alfite'een;

dhugaaten, buttate'n muraak Mageni hedheen» hiyyaan.