Shoolgake Edi Sanbata'n Daawwitixxa Faaro 1 Ee Duuchchi Woddike Goottaa! Ati halo fuldatoke Magenon; tennexxee mufe atixxa insa'ne'n bidhdhi.

2 Butta duuchcha'n murtatok ateten; tennexxee ke'i; hollameeyye huje insa'nexxishshan xixi.

3 Fuggaaleeyye haani qico'n ifi saadda'ni hexxa?

Ee Duuchchi Woddike Goottaa! Isi haani qico'nita ifi saadda'ni hexxa?

4 Haani qico'ni fuggaaleeyye ifi saadda'ni holla calla haassota'n hexxa?

5 Ee Duuchchi Woddike Gootta!

Arda atika bogii'n fulchineen; atika manna miinceen.

6 Aro'i reyeexxa mellaalenna

anna ama affebaaxxa oose shinneen;

keessummumma boga no'oke'n offo'le manna birreen. 7 Insa'nenna, «Duuchchi Woddik Gootti no'oo afabaan;

Ya'iqoobik Mageni uudabaan» hinaan.

8 Ardi giddii'n ha'no hawwawwi manni qaabbatte; ha'no gowwi manni ege'na alfitinaak haanote?

9 Mansha dadeek Mageni hitta laqa gophata?

Ille dadeek Magenita hitta afa gopha?

10 Gosa gosaka arda daabataak hitta xixa gopha?

Manjiinxa sanne duuchcha barachchiisakita ege'na afabaa?

11 Duuchchi Woddik Gootti manjink yaadi

woyi fulabaake kadeexxa ege'ne'een.✝

12 Duuchchi Woddike Goottaa! Ati xixatokenna

seera atika barachchiissatoke manjixxa wodo!

13 Mageni insa'nee rakkotenaa'n gatiso'a

fuggaaleeyyetee'e bale qote.

14 Duuchchi Woddiki Gootti arda ifika waalabaan;

ifike kadeeka mannanna dedhabaan.

15 Dhugaa haaroba murtetixxe songo'n hujjendaan;

dhugaate'ni galaak manninna isee eeyyaan.

16 Ani'a baasseexxi xaqaritiyyete'n ke'aak ayyeete?

Ayyete ani'a fuggaaleeyyeeti moromaak?

17 Duuchchi Woddik Gootti anee gargaara gopheele

iikki woddi silaan reyemmak manni hedhemmaba me'eennan.

18 «Ibe gatene» hiyyenne wodda

Ee Duuchchi Woddike Gottaa! Jaalala atixxe duuchchi woddixxenni anee'e kiphphette.

19 Rakkisaak yaadi ane'n bira sa'eexxa yanna

jajjabeessite'e anee gammachchiisseten.

20 Seeri beloxxa yaane dabik seeriinxe assexxi muraakeerinni firummaa affeeteta?

21 Insa'ne qulliyyete'n fuggoxxa mari'antaan;

balleessa afebaak manninna shiyyemaashsha murraan.

22 Yaane kinni Duuchchi Woddik Gootti anke gollan;

Magenikinna anke dalla'an.

23 Isi assineemmaxxe fuggoxxee'e insa'nee xixaan;

hunjemmaxxe cubboxxeenna insa'nee biraan;

Duuchchi Woddik Gootti, no'ok Mageni insa'nee kutti assaan.