1 Ee Magenoo!

Ani atee addatennaxxee anee heqqi.

2 Ee Duuchchi Woddike Goottaa, «Ati anke dada Duuchchike Goottaan;

ani afennexxi elolla yaane duuchcha

ati ani'a uuttettexxe uwwan» hiyyenne.

3 Buttate'n hedheek woyyichchi manni

ulfate'eeken; aninna insa'ne'n gammadannon.

4 Wele magenuwwa magenoofataakaara lummoxxe rakko geltaan;

iitta hedheeke magenuwwi'a hore tolche'e munde shiqishabe'non;

konne magenuwwanna magenoofatabe'non.

5 Ee Duuchchi Woddike Goottaa! Ati anke qoobbon;

hassissaxxa duuchchanna ani'a uuttatton;

muuxami ankinna anga atixxi giddo hedheen.

6 Ani'a uuttotta'a mikkeettexxi yaanuwwa ellollaten;

eeti, anee gammachchiisaake qoobbo afe'eennen.

7 Ani'a gorsa uwweeka Duuchchi Woddika Gootta galateefataannen;

hashshanna midde anxi sammo me'annoka eloka ora akkeekaan.

8 Duuchchi wodda, Duuchchi Woddika Gootta ifi edo uggudheennen;

Isinna ani bira hedhemmaxxee anee sodachchiisaachchi hedhebaan.

9 Tennexxee gammada'nee galateeffataannen;

ruphphi hiyya gate'naanna ti'ni hiyyee hedhannon.

10 Lubbo anxa reyemmaki manni hedhemmaba waaldabexxon;

atika woyyichchanna* alo'a iso'n geltaashsha assitabexxon.✝

11 Hedhotika oranna ane'ni leellishshatton;

aninninni welti hexxe'e gammachiissatton;

atike midda'ninna duuchchi woddi'a hafuura adhdhate hexxeen.✝